گەرمانيا پانا سۇراۋشىلار ءۇشىن شەكاراسىن جابادى

استانا. KAZINFORM - بەيسەنبىدەن باستاپ گەرمانيا پانا سۇراۋشىلاردى ەلگە كىرگىزبەيدى جانە شەكاراداعى باقىلاۋدى كۇشەيتەدى، دەپ جازادى Euronews.

بۇل تۋرالى ەلدىڭ ىشكى ىستەر ءمينيسترىنىڭ جاڭا باسشىسى الەكساندر دوبريندت مالىمدەدى.

كانسلەر لاۋازىمىنا كىرىسكەن العاشقى كۇنىندە فريدريح مەرتس «زاڭسىز كىرۋ ارەكەتتەرىنىڭ بارلىعىنا توسقاۋىل قويىلاتىنىن، جارامدى ءتولقۇجاتى جوق بارلىق ادام ءۇشىن كىرۋگە تىيىم سالىنادى» دەپ مالىمدەدى. بۇل ەۋروپالىق وداقتىڭ قاۋىپسىز ەلدەرى ارقىلى وتەتىن پانا سۇراۋشىلارعا دا قاتىستى.

اقپان ايىندا اشاففەنبۋردە ەلدەن شىعارىلۋى ءتيىس 28 جاستاعى اۋعانستان ازاماتى ساياباقتا بالاباقشا بۇلدىرشىندەرىنە پىشاقپەن شابۋىل جاساعان. قايعىلى وقيعا سالدارىنان ماروككولىق بالا مەن نەمىس ازاماتى قازا تاپتى، تاعى ءۇش ادام اۋىر جاراقات الدى.

ەندى جاڭا ىشكى ىستەر ءمينيسترى الەكساندر دوبريندت (ح س س) مەرتسكە بەرگەن ۋادەسىن ورىنداۋعا كىرىستى.

سارسەنبىدە دوبريندت فەدەرالدى پوليسياعا شەكارالىق باقىلاۋدى كۇشەيتۋ جانە زاڭسىز كىرۋ جاعدايىندا قۇجاتتاردى قابىلداۋدان باس تارتۋ تۋرالى بۇيرىق بەردى. بۇل ەو ەلدەرى مەن شۆەيتساريا ارقىلى العاش رەت ەلگە كىرەتىن ادامدارعا قاتىستى.

ايتا كەتۋ كەرەك، 2015 -جىلى مەركەل كەزىندە شىعارىلعان قاۋلىدا فەدەرالدى پوليسيا قىزمەتكەرلەرىنە قۇجاتتارى زاڭسىز ميگرانتتاردى، ەگەر ولار پانا سۇراسا، نەمىس شەكاراسىنان وتۋگە رۇقسات بەرۋدى مىندەتتەگەن («قۇجاتتارى جوق جانە پانا سۇرايتىن ءۇشىنشى ەلدەردىڭ ازاماتتارىنا كىرۋگە رۇقسات ەتىلەدى»). بۇل قۇجاتتىڭ سالدارىنان توعىز جىل بويى جۇزدەگەن مىڭ ادام گەرمانياعا باقىلاۋسىز كىردى، ءبىراق ولاردىڭ كوپشىلىگىنىڭ پانا الۋعا قۇقىعى بولمادى. باقىلاۋسىز جانە زاڭسىز ميگراتسيا گەرمانيادا قىلمىس پەن زورلىق-زومبىلىقتىڭ ارتۋى ءتارىزدى قاۋىپسىزدىك ماسەلەلەرىن تۋىنداتتى.

بۇعان دەيىن قاسىم-جومارت توقايەۆ فريدريح مەرتستى گەرمانيانىڭ فەدەرالدىق كانتسلەرى بولىپ سايلانۋىمەن قۇتتىقتاعانى حابارلاندى.