بۇل تۋرالى ۇكىمەتتىڭ باسپا ءسوز قىزمەتى حابارلادى.
جيىندا جاڭا قۋات كوزدەرىن ىسكە قوسۋ، ەلدى مەكەندەردى گازبەن قامتۋ، ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋ جوسپارلارى قارالدى.
ەنەرگەتيكا مينيسترلىگىنە جاڭا قۋات كوزدەرىن ۋاقتىلى ىسكە قوسۋ جانە ەلەكتر ستانسالارىن جاڭعىرتۋدى باقىلاۋعا الۋ تاپسىرىلدى. كومىر گەنەراتسياسىنىڭ ءىرى جوبالارى - ەكىباستۇز م ا ە س-3، كۋرچاتوۆتاعى كەس، كوكشەتاۋ، سەمەي، وسكەمەن قالالارىنداعى جاڭا ج ە و- لاردى جۇزەگە اسىرۋعا ەرەكشە نازار اۋدارىلدى.
2035-جىلعا دەيىنگى ەنەرگەتيكالىق تەڭگەرىمدى وزەكتەندىرۋ كەزىندە جاساندى ينتەللەكت سالاسىنداعى جوبالار مەن دەرەكتەر ورتالىقتارى تاراپىنان تۋىندايتىن ەلەكتر ەنەرگياسىنا قوسىمشا سۇرانىستى ەسكەرۋ قاجەت.
وڭىرلەردى گازداندىرۋ بويىنشا تۇرعىندار سانى ەڭ كوپ ەلدى مەكەندەرگە باسىمدىق بەرۋگە، سونداي-اق تۇتىنۋشىلاردى گاز جەلىلەرىنە قوسۋ مۇمكىندىكتەرىن ودان ءارى كەڭەيتۋگە باسا نازار اۋدارىلدى.
ينفراقۇرىلىمدى دامىتۋ قورىنىڭ قاراجاتى ەسەبىنەن قارجىلاندىرىلاتىن كوممۋنالدىق ينفراقۇرىلىمدى جاڭعىرتۋ جوبالارى بويىنشا اكىمدىكتەر قۇجاتتامانى ۋاقتىلى دايىنداۋى، ساراپتامادان ءوتۋدى قامتاماسىز ەتۋى، مەردىگەرلەردى انىقتاۋى قاجەت. بۇل رەتتە باستى نازار قۇرىلىس مەرزىمى مەن ساپاسىنىڭ ساقتالۋىنا، قاراجاتتاردىڭ ماقساتتى جۇمسالۋىنا اۋدارىلۋى ءتيىس.
كەڭەس قورىتىندىسى بويىنشا مەملەكەتتىك ورگاندار مەن ۇيىمداردىڭ ءبىرىنشى باسشىلارىنىڭ قويىلعان مىندەتتەردى ورىنداعانىنا قاتىستى، سونداي-اق نىسانداردى پايدالانۋعا ۋاقىتىلى بەرۋدەگى دەربەس جاۋاپكەرشىلىگى اتاپ ءوتىلدى.
ايتا كەتەيىك، قازاقستان اتوم ەنەرگەتيكاسىن ءۇش ەسەگە ارتتىرۋ باستاماسىن قولدادى.