ەرلان قوشانوۆ: گەرب ماسەلەسىنىڭ تالقىعا ءتۇسۋى - قوعامداعى پىكىر الۋاندىعىنىڭ كورىنىسى

استانا. KAZINFORM - مەملەكەت باسشىسى ۇلتتىق قۇرىلتايدا كوتەرگەن ماڭىزدى ماسەلەلەر جونىندە پارلامەنتتىك تىڭدالىم وتكىزىلمەك. بۇل تۋرالى ءماجىلىستىڭ جالپى وتىرىسىندا پالاتا سپيكەرى ەرلان قوشانوۆ ايتتى.

«ارحەولوگيا، مەملەكەتتىك رامىزدەر مەن مەملەكەتتىك ناگرادالار سالاسىنداعى زاڭنامانى جەتىلدىرۋ جۇمىسى كۇتىپ تۇر. ماسەلەن، كەيىنگى كۇندەرى قوعام قىزۋ تالقىلاپ جاتقان گەرب ماسەلەسى وزەكتى بولىپ وتىر. شىنتۋايتىندا، اتالعان ماسەلەنىڭ تالقىعا ءتۇسۋى - قوعامداعى پىكىر الۋاندىعىنىڭ كورىنىسى. قولدانىستاعى گەربتىڭ بەينەسىنە بايلانىستى جاستار، قوعام بەلسەندىلەرى تاراپىنان كوتەرىلگەن ۇسىنىسقا پرەزيدەنتىمىز قۇرىلتايدا ءوز پىكىرىن ءبىلدىرىپ، ورتاق، بايىپتى شەشىمگە كەلۋگە شاقىردى. مەملەكەت باسشىسى وسىلايشا گەرب ماسەلەسىن اشىق تالقىلاۋعا شىعارىپ وتىر»، - دەدى ەرلان قوشانوۆ.

وسى ورايدا پالاتا سپيكەرى جالپى جۇرتشىلىقپەن بىرگە، مەملەكەتتىك سيمۆوليكانى زەرتتەپ جۇرگەن گەرالديكا سالاسىنىڭ كاسىپقوي ماماندارىنىڭ ۇسىنىستارى جەتە تالقىلانۋى قاجەتتىگىن باسا ايتتى.

«ءبىزدىڭ گەرب - سان عاسىرلىق تاريحىمىزدى تاڭبالايتىن، مەملەكەتىمىزدىڭ ايبىنىن اسىراتىن، حالقىمىزدىڭ اسقاق رۋحىن ايشىقتايتىن نەگىزگى سيمۆول بولۋى كەرەك. ەڭ باستىسى، ەلىمىزدىڭ بولاشاققا ۇمتىلىسىن بەينەلەيتىن بىرەگەي اتريبۋتيكاسىنا اينالۋى ءتيىس. بۇل، ارينە، قوعام مەن ارناۋلى كوميسسيانىڭ قۇزىرەتىندەگى ماسەلە. پرەزيدەنت بەلگىلەپ بەرگەن باعىت-باعدار بارىڭىزگە تۇسىنىكتى دەپ ويلايمىن. سوندىقتان ۇلتتىق قۇرىلتايدا كوتەرىلگەن ماڭىزدى ماسەلەلەر جونىندە پارلامەنتتىك تىڭدالىم وتكىزۋىمىز قاجەت دەپ سانايمىن. سەبەبى كەلەلى جيىندا ايتىلعان ناقتى ۇسىنىستاردى ورىنداۋ بويىنشا ماقساتمىندەتتەرىمىزدى بىرگە ايقىنداۋىمىز كەرەك»، - دەدى ەرلان قوشانوۆ.

اۆتور

مارلان جيەمباي