ەرلان قارين سۇيىكتى كىتاپتارىنىڭ ءتىزىمىن جاريالادى

استانا. KAZINFORM - ادەبي چەللەندجدى مەملەكەتتىك كەڭەسشى ەرلان قارين قابىلداپ، eGov ارقىلى بەلگىلەگەن سۇيىكتى كىتاپتارىن ۇسىندى.

- قۇرمەتتى دوستار، «ۇلتتىق كىتاپ كۇنى» بيىل العاش رەت اتالىپ وتكەنىن بىلەسىزدەر. مۇنىڭ تۇپكى يدەياسى بىلتىرعى اتىراۋدا وتكەن ۇلتتىق قۇرىلتايدان باستالادى. مەملەكەت باسشىسى @tokayev_online وزىق ويلى ۇلت بولۋ تۋرالى ايتا كەلىپ، ونىڭ ءبىر كىلتى وسى كىتاپ وقۋ داعدىسىندا جاتقانىنا توقتالعان بولاتىن. ءسويتىپ، قاسىم-جومارت كەمەل ۇلىنىڭ تاپسىرماسى بويىنشا 23-ءساۋىر «ۇلتتىق كىتاپ كۇنى» بولىپ بەكىتىلگەن ەدى، - دەدى ول.

ەرلان قارين قانداي كىتاپ وقۋ دەگەن ماسەلە دە وتە ماڭىزدى دۇنيە ەكەنىن ايتتى.

- كىتاپ وقۋ ءوز الدىنا، قانداي كىتاپ وقۋ دەگەن ماسەلە دە وتە ماڭىزدى دۇنيە. بۇل رەتتە، كىم نەنى وقىپ جاتىر، مەن نە وقيمىن دەگەن سۇراق العا شىعادى. وقىرماندار اراسىندا كىتاپ الماسۋ مادەنيەتى دە بار ەكەنىن بىلەسىزدەر. جازۋشىلارىمىزدىڭ دا قولعا تۇسە بەرمەيتىن كىتاپتى ءبىر-بىرىنەن اتتاي قالاپ، سۇراپ، ءتىپتى «سۇراماي» الىپ جاتاتىنى تۋرالى دا ەستەلىكتەر دە از ەمەس. مۇنىڭ ءبارى، تۇپتەپ كەلگەندە، ادامزاتتىڭ كىتاپقا قۇمارلىعىن عانا ەمەس، كىتاپقا دەگەن تالعامىن دا كورسەتەدى، - دەدى مەملەكەتتىك كەڭەسشى.

ول جاقىندا جەلىدە بەلگىلى اقىن قالقامان ساريننىڭ باستاماسىمەن باستاۋ العان ادەبي ەستافەتانى ءدىنتانۋشى، قوعام بەلسەندىسى قايرات جولدىبايدان الىپ، جالعاستىرىپ، بۇگىن eGov ارقىلى بەلگىلەگەن سۇيىكتى كىتاپتارىن ۇسىندى:

1. اباي. قارا سوزدەر جيناعى؛
2. ماعجان جۇمابايەۆ. ولەڭدەر جيناعى؛
3. مۇحتار اۋەزوۆ. «اباي جولى»؛
4. جىراۋلار پوەزياسى. «بەس عاسىر جىرلايدى»؛
5. ءىلياس ەسەنبەرلين «كوشپەندىلەر»؛
6. باۋىرجان مومىش ۇلى «سوعىس پسيحولوگياسى»؛
7. ءابىش كەكىلبايەۆ «ۇركەر»؛
8. دۋلات يسابەكوۆ «قارعىن»؛
9. ماكسيم زۆەريەۆ «كلادوۆايا چۋدەس ؛
10. تولەن ابدىك «پاراسات مايدانى».

- ادەبي ەستافەتانى جالعاستىرۋ ءۇشىن، قازاقستان رەسپۋبليكاسى پارلامەنتى ءماجىلىسىنىڭ ءتوراعاسى - قوشانوۆ ەرلان جاقان ۇلىنا @koshanov_online، جازۋشىلار وداعىنىڭ ءتوراعاسى مەرەكە قۇلكەنوۆكە، ۇلتتىق مۋزەي ديرەكتورى - بەرىك ءابدىعالي ۇلىنا @abdygaliuly، بەلگىلى جۋرناليست، بلوگەر - وركەن كەنجەبەككە @orkeni جولدايمىن. قۇرمەتتى كىتاپسۇيەر قاۋىم، سىزدەر دە جالپى حالىقتىق ساۋالناما قاتىسىپ، eGov پورتالى ارقىلى ءسۇيىپ وقيتىن 10 كىتابىڭىزدى ۇسىنا الاسىز. ساۋالناما ناتيجەسى قازاق رۋحانياتىنداعى تاعى ءبىر اتاۋلى مەرەكە — «اباي كۇنى» (10-تامىز) جاريالانادى، - دەدى ەرلان قارين.

ايتا كەتەلىك رەداكسيا القاسى قازاقستان تاريحى جونىندەگى اكادەميالىق باسىلىمنىڭ ءبىرىنشى تومىن قاراعان ەدى.