ەرلان قارين قوعام بەلسەندىلەرىنە مەملەكەتتىك ناگرادا تاپسىردى

استانا. KAZINFORM - رەسپۋبليكا كۇنى قارساڭىندا ءبىرقاتار قوعام قايراتكەرى مەملەكەتتىك ناگرادالارمەن ماراپاتتالدى، دەپ حابارلايدى اقوردا.

ەلىمىزدىڭ ساياسي، الەۋمەتتىك-ەكونوميكالىق دامۋىنا ەلەۋلى ۇلەس قوسقانى جانە بەلسەندى قوعامدىق قىزمەتى ءۇشىن مەملەكەت باسشىسىنىڭ جارلىعىمەن ءبىرقاتار قوعام قايراتكەرى مەملەكەتتىك ناگرادالارمەن ماراپاتتالدى.

ۇلتتىق مەرەكە - رەسپۋبليكا كۇنى قارساڭىندا مەملەكەتتىك كەڭەسشى ەرلان قارين ۇلتتىق قۇرىلتايدىڭ، قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ ءبىرقاتار مۇشەسىنە جانە ايماقتان كەلگەن قوعام بەلسەندىلەرىنە مەملەكەتتىك ناگرادا تاپسىردى.

اتاپ ايتقاندا، «پاراسات» وردەنىمەن ۇلتتىق قۇرىلتايدىڭ مۇشەسى، تۇركىستان وبلىستىق قوعامدىق كەڭەسىنىڭ ءتوراعاسى ءبايدىلدا جىلقىشيەۆ ماراپاتتالدى.

ال ۇلتتىق قۇرىلتايدىڭ جانە باتىس قازاقستان وبلىستىق قوعامدىق كەڭەسىنىڭ مۇشەسى باۋىرجان عۇبايدۋللين، م. وتەمىسوۆ اتىنداعى باتىس قازاقستان ۋنيۆەرسيتەتىنىڭ دوتسەنتى جاڭابەك جاقسىعاليەۆ، قوستاناي اۆتوموبيل كولىگى كوللەدجىنىڭ ديرەكتورى دميتري پاۆلەنكو «قۇرمەت» وردەنىنىڭ يەگەرى اتاندى.

سونداي-اق شىعىس قازاقستان وبلىسى ازاماتتىق اليانسىنىڭ ءتوراعاسى، وبلىستىق كوعامدىق كەڭەستىڭ مۇشەسى اياۋجان ءاشىموۆا مەن شىعىس قازاقستان وبلىسى ۇلان اۋدانىنداعى قاسىم قايسەنوۆ اتىنداعى ورتا مەكتەپتىڭ ديرەكتورى اسەم چامكايەۆاعا «ەرەن ەڭبەگى ءۇشىن» مەدالى تاپسىرىلدى.

قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ مۇشەلەرى - ءدىنتانۋشى، ءدىني ەكسترەميزمگە قارسى ءىس-قيمىل جونىندەگى ساراپشى ەلنار بەرىكبايەۆ، «قوعامدىق كەلىسىم» ينستيتۋتىنىڭ ديرەكتورى ەلينا ماساگۋتوۆا، قوعام بەلسەندىسى عالىمجان مىرزابايەۆ، سونداي-اق قازاقستاننىڭ ازاماتتىق اليانسىنىڭ اتقارۋشى ديرەكتورى مۇرات وماشيەۆ «شاپاعات» مەدالىمەن ماراپاتتالدى.

ەرلان قارين تاۋەلسىزدىك پەن ەگەمەندىكتىڭ، بارشا ازاماتتىڭ بەرەكەلى بىرلىگى مەن ىرىستى ىنتىماعىنىڭ جارقىن سيمۆولى سانالاتىن ۇلتتىق مەرەكە - رەسپۋبليكا كۇنىمەن ماراپات يەلەرىن قۇتتىقتادى.

ەسكە سالساق، بۇگىن پرەزيدەنت جارلىعىمەن رەسپۋبليكا كۇنىنە وراي عالىمدار، مۇعالىمدەر، دارىگەرلەر، قۇتقارۋشىلار جانە جۇمىسشىلار ماراپاتتالدى. مەملەكەت باسشىسى رەسپۋبليكا كۇنىنە وراي وتكەن سالتاناتتى جيىندا ءسوز سويلەدى.