ەرلان قارين: قازاقستانداعى وزگەرىستەردىڭ ماڭىزدى جانە جارقىن كورسەتكىشى - ناقتى پىكىر پليۋراليزمى

استانا. KAZINFORM - ق ر مەملەكەتتىك كەڭەسشىسى ەرلان قارين قازاقستاندا جۇرگىزىلگەن ينستيتۋتسيونالدىق رەفورمالاردىڭ ارقاسىندا جاڭا تەڭدەستىرىلگەن بيلىك جۇيەسى قالىپتاسقانىن ايتتى.

ايتۋىنشا، سونىڭ اياسىندا پارلامەنتتىڭ ىقپالى ايتارلىقتاي ۇلعايىپ، ۇكىمەتتىڭ جاۋاپكەرشىلىگى ارتتى، كونستيتۋتسيالىق سوت قۇرىلدى.

«كەشە مەملەكەت باسشىسى ب ا ق قىزمەتكەرلەرى كۇنى قارساڭىندا ءسوز سويلەپ، جالپىۇلتتىق دەڭگەيدەگى اۋقىمدى ماسەلەلەرگە قاتىستى پىكىر ءبىلدىردى. قازاقستاننىڭ كوپتەن بەرى جاڭا ساياسي احۋالدا ءومىر ءسۇرىپ جاتقانى تۋرالى ايتتى. مۇنى ەڭ باستى تەزيستىڭ ءبىرى دەۋگە بولادى. سوڭعى بەس جىلدا ەلىمىزدە اۋقىمدى ءارى تۇبەگەيلى وزگەرىستەر بولدى. قازاقستاندا جۇرگىزىلگەن ينستيتۋتسيونالدىق رەفورمالاردىڭ ارقاسىندا جاڭا تەڭدەستىرىلگەن بيلىك جۇيەسى قالىپتاستى. سونىڭ اياسىندا پارلامەنتتىڭ ىقپالى ايتارلىقتاي ۇلعايىپ، ۇكىمەتتىڭ جاۋاپكەرشىلىگى ارتتى، كونستيتۋتسيالىق سوت قۇرىلدى. ازاماتتاردىڭ الەۋمەتتىك بەلسەندىلىگى مەن ساياسي مادەنيەتىنىڭ ارتۋى - جاڭا ساياسي احۋالدىڭ ايقىن كورىنىسى. مەملەكەت ازاماتتاردىڭ ءوز ۇستانىمدارىن ەركىن جانە اشىق ءبىلدىرۋى، شەشىم قابىلداۋ ۇدەرىسىنە بەلسەندى قاتىسۋى ءۇشىن ۇلكەن قادامدار جاسادى، جاساي بەرەدى دە. سونىڭ ارقاسىندا بۇگىندە ءبىز ساياسي جانە الەۋمەتتىك مادەنيەتتە سىندارلى ديالوگ، دەموكراتيا جانە كونسترۋكتيۆيزم قاعيداتتارىنا نەگىزدەلگەن مۇلدە جاڭا نورمالار مەن ستاندارتتاردى قالىپتاستىردىق. قازاقستانداعى وزگەرىستەردىڭ ماڭىزدى جانە جارقىن كورسەتكىشى - ناقتى پىكىر پليۋراليزمى. قوعامدىق ءومىردىڭ اجىراماس بولىگىنە اينالعان ءسوز بوستاندىعى ءقازىردىڭ وزىندە قالىپتى جاعداي سانالادى. بۇل ەڭ اۋەلى پرەزيدەنت ۇسىنعان «ءارتۇرلى پىكىر - ءبىرتۇتاس ۇلت» قاعيداسىنىڭ ارقاسىندا مۇمكىن بولىپ وتىر. جالپى، مەملەكەت باسشىسىنىڭ بۇل سوزىندە ادىلەتتى قازاقستان قۇرۋ باعىتىنىڭ وزگەرمەيتىندىگى، باستالعان كەشەندى رەفورمالاردىڭ كەرى قايتپايتىندىعى جانە بۇل ۇدەرىستەگى قوعام مەن ازاماتتاردىڭ ءرولى ايرىقشا ەكەندىگى تۋرالى ماڭىزدى مەسسەدجدەر بار»، - دەپ جازدى ەرلان قارين telegram-دا.