ەرلان قارين: ماراپاتقا يە بولعانداردىڭ باسىم بولىگى - جۇمىسشى ماماندىقتار وكىلدەرى

استانا. قازاقپارات - 137 مۇعالىم مەن 80 عالىمنىڭ ماراپاتتالۋى - مەملەكەتتىك ساياساتتىڭ وزىق ويلى قوعامدى قالىپتاستىرۋعا، جاسامپازدىق پەن جاڭاشىلدىق قۇندىلىقتارىن ناسيحاتتاۋعا باعىتتالعانىن ايعاقتايدى.

بۇل تۋرالى مەملەكەتتىك كەڭەسشى ەرلان قارين تەلەگرامداعى كانالىندا جازدى.

«مەملەكەتتىك ناگرادالارمەن ماراپاتتالعان ازاماتتاردىڭ ەلگە سىڭىرگەن ەڭبەگى پرەزيدەنت قاسىم-جومارت توقايەۆتىڭ ۇلتتىق قۇرىلتايدىڭ ءۇشىنشى وتىرىسىندا ايتقان جالپىۇلتتىق قۇندىلىقتارىمەن تولىق ۇندەسەدى. بىرىنشىدەن، مەملەكەتتىك ماراپاتقا يە بولعان ازاماتتاردىڭ باسىم بولىگى، ياعني 450 دەن استام ادام - جۇمىسشى ماماندىقتارىنىڭ وكىلدەرى، اتاپ ايتقاندا شاحتەرلەر، كولىك قىزمەتكەرلەرى جانە باسقا دا ءوندىرىس سالاسىنىڭ ماماندارى. سونداي- اق جالپى جۇمىس ءوتىلى جۇزدەگەن جىلداردى قۇرايتىن ەڭبەك ديناستيا وكىلدەرىنە دە ايرىقشا ءمان بەرىلدى. وسىلايشا، مەملەكەت باسشىسى ەڭبەكقورلىق پەن كاسىبي بىلىكتىلىك قۇندىلىقتارىن يدەولوگيانىڭ ماڭىزدى باعىتى رەتىندە دارىپتەۋدىڭ وزەكتى ەكەنىنە نازار اۋداردى.

ەكىنشىدەن، «قازاقستاننىڭ ەڭبەك ەرى» جوعارى اتاعىن العان ءتورت ادامنىڭ ۇشەۋى عىلىم مەن ءبىلىم سالاسىنىڭ وكىلدەرى ەكەنىن ەرەكشە اتاپ ءوتۋ كەرەك. مۇنىڭ ءبارى عىلىم مەن ءبىلىمدى دامىتۋعا، عالىمدار مەن ۇستازداردىڭ مارتەبەسىن كوتەرۋگە قاتىستى ناقتى ءىس-شارالاردى جوسپارلى تۇردە جۇرگىزىپ جاتقان پرەزيدەنت ساياساتىنىڭ بىرىزدىلىگىن كورسەتەدى. 137 مۇعالىم مەن 80 عالىمنىڭ ماراپاتتالۋى - مەملەكەتتىك ساياساتتىڭ وزىق ويلى قوعامدى قالىپتاستىرۋعا، جاسامپازدىق پەن جاڭاشىلدىق قۇندىلىقتارىن ناسيحاتتاۋعا باعىتتالعانىن ايعاقتايدى.

ۇشىنشىدەن، ماراپاتتالعان ازاماتتاردىڭ اراسىندا سەرجان شاكىرات، نۇرلان ونەرباي، سەكەن تۇرىسبەكوۆ، مايرا مۇحامەد قىزى، سامال ەسلياموۆا جانە ت. ب. سياقتى ونەر سالاسىنىڭ مايتالماندارى دا از ەمەس. سول ارقىلى مەملەكەت باسشىسى ۇلت رۋحانياتىن دامىتۋدىڭ جانە قوعامدا جوعارى مادەنيەت قالىپتاستىرۋدىڭ ماڭىزدىلىعىن پاش ەتتى»، - دەپ جازدى ەرلان قارين.

ونىڭ سوزىنە قاراعاندا، پرەزيدەنت ۇلتتىق قۇرىلتايدىڭ وتىرىسىندا ءبىلىم، عىلىم جانە مادەنيەتتى قازىرگى قوعامنىڭ ءۇشتاعانى دەپ اتادى.

جالپى، پرەزيدەنتتىڭ اتىراۋداعى وتىرىستا ايتقان يدەولوگيالىق تەزيستەرى ناقتى قادامدار مەن باستامالار ارقىلى جۇزەگە اسىرىلىپ جاتىر.

ەسكە سالساق، بۇگىن پرەزيدەنت جارلىعىمەن رەسپۋبليكا كۇنىنە وراي عالىمدار، مۇعالىمدەر، دارىگەرلەر، قۇتقارۋشىلار جانە جۇمىسشىلار ماراپاتتالدى. مەملەكەت باسشىسى رەسپۋبليكا كۇنىنە وراي وتكەن سالتاناتتى جيىندا ءسوز سويلەدى.