ەرلان قارين ۇلتتىق قۇرىلتاي تۋرالى ايتتى

 استانا. KAZINFORM - مەملەكەتتىك كەڭەسشى ەرلان قارين Telegram ارناسىندا ۇلتتىق قۇرىلتاي تۋرالى ايتتى.

- جالپى ۇلتتىق قۇرىلتاي - قوعامىمىزدىڭ ەرەكشە ءبىر سالاسى. ول سان الۋان توپتاردى بىلدىرەدى: زيالى قاۋىم، بيزنەس، قۇقىق قورعاۋشىلار، ازاماتتىق بەلسەندىلەر، ساراپشىلار جانە ت. ب. سوندىقتان مەملەكەت باسشىسى ءۇشىن ۇلتتىق قۇرىلتاي ەل دامۋىنىڭ وزەكتى ماسەلەلەرى بويىنشا ءوز ۇستانىمىن ايقىندايتىن تاعى ءبىر ۇلكەن الاڭعا اينالدى»، - دەپ جازدى ەرلان قارين.

ونىڭ ايتۋىنشا، پرەزيدەنتتىڭ ءسوزىن ۇلتتىق قۇرىلتايدىڭ جۇمىس سەكتسيالارى مەن پلەنارلىق وتىرىسىندا ايتىلعان پىكىرتالاستارعا، يدەيالارعا، باستامالارعا جەدەل، جۇيەلى جاۋاپ بەرۋ جانە كەرى بايلانىس ورناتۋدىڭ ءتيىمدى قۇرالى دەپ ساناۋعا بولادى. سوندىقتان دا ول وسىنداي كەڭ اۋقىمدى ماسەلەلەر بويىنشا ءوز ۇستانىمىن ايقىنداپ بەردى. سايكەسىنشە، مەملەكەت باسشىسىنىڭ اتىراۋداعى سوزىنە جۇرتشىلىق تاراپىنان دا كوپتەگەن جاۋاپ ايتىلدى - اركىم ءوز مۇددەلەرى مەن وتىنىشتەرىن جەتكىزدى. سونىمەن قاتار ەرلان قارين اتىراۋلىق باياندامانىڭ يدەولوگيالىق سالا ءۇشىن ماڭىزىنا توقتالدى. ول سونداي-اق باياندامانىڭ ەكونوميكالىق قۇرامداس بولىگىنە قاتىستى بىرنەشە اسپەكتىنى اتاپ ءوتتى.

- بىرىنشىدەن، اتىراۋدا ءتورت اۋقىمدى ينفراقۇرىلىمدىق كەشەننىڭ ىسكە قوسىلعانى جاريالاندى. تۇرعىن ءۇي قۇرىلىسىنىڭ جاڭا باعدارلاماسىن، ونىڭ ىشىندە اۋىلدار مەن اۋدان ورتالىقتارىنىڭ تۇرعىندارىن، حالىقتىڭ الەۋمەتتىك وسال ساناتتارى ءۇشىن مولشەرلەمەسى 7 پايىزدان اسپايتىن تۇرعىن ءۇي باعدارلاماسىن ىسكە قوسۋ تۋرالى تاپسىرما بەرىلگەن بولاتىن. سونىمەن قاتار ۇكىمەتكە مەملەكەت باسشىسىنىڭ باستاماسىمەن ساتىپ الۋ قۇقىعىمەن بەرىلەتىن جالعا بەرىلەتىن تۇرعىن ءۇي كولەمىن ايتارلىقتاي ارتتىرۋ قاجەت. سونداي- اق تاۋەلسىز قازاقستان تاريحىنداعى رەكوردتىق كورسەتكىشكە اينالاتىن جوندەۋ- قۇرىلىس جۇمىستارىمەن كەمىندە 12 مىڭ شاقىرىم جولدى قامتۋ مىندەتى قويىلدى. ەلدەگى ازاماتتاردىڭ ءومىر ءسۇرۋ ساپاسى مەن قورشاعان ورتانىڭ جاعدايىن جاقسارتۋ ءۇشىن كەمىندە 1700 شاقىرىم گاز جەلىلەرىن جاڭعىرتۋدىڭ دا ماڭىزى زور. بۇل باستامالاردىڭ بيىلعى جىلى وتاندىق كاسىپورىنداردى بارىنشا تارتۋ ارقىلى جۇزەگە اسىرۋ جوسپارلانىپ وتىر.

ەكىنشىدەن، پرەزيدەنت اشىق، نارىقتىق ەكونوميكانى قۇرۋ، جەدەلدەتىلگەن سيفرلاندىرۋ، جاساندى ينتەللەكتىنى دامىتۋ، ترانزيتتىك-كولىكتىك الەۋەتتى نىعايتۋ، كاسىپكەرلىكتى قولداۋ، يننوۆاتسيالاردى ىنتالاندىرۋ جونىندەگى ستراتەگيالىق مىندەتتەرگە تاعى ءبىر مارتە قىسقاشا توقتالىپ ءوتتى. قازاقستاننىڭ جاھاندىق باسەكەگە قابىلەتتىلىك جارىسىنداعى مۇمكىندىگى ونىڭ باسەكەلەستىك ارتىقشىلىقتارىن ءتيىمدى پايدالانۋىندا جانە جاڭا ءوسۋ نۇكتەلەرىن ۇنەمى ىزدەستىرۋدە. مەملەكەت باسشىسىنىڭ بۇل ايتقاندارى ەلىمىزدىڭ ىلگەرى دامۋى ءۇشىن اسا ماڭىزدى،- دەلىنگەن حابارلامادا.

مەملەكەتتىك كەڭەسشى اتاپ وتكەن سوڭعى ماسەلە - پرەزيدەنتتىڭ بۇكىل ايماقتىق كۇن تارتىبىنە قانشالىقتى تيەسىلى ەكەنى.

- ۇشىنشىدەن، مەملەكەت باسشىسىنىڭ اتىراۋ وبلىسىنا قاتىستى ماسەلەلەرگە ارنايى توقتالعانى كوڭىل اۋدارارلىق جاعداي. ول وڭىردەگى ءبىرقاتار ينفراقۇرىلىمدىق، الەۋمەتتىك، ەكولوگيالىق ماسەلەنى شەشۋگە ناقتى تاپسىرمالار بەرىپ، بۇكىل ايماقتىق كۇن ءتارتىبىن تولىق باقىلاۋدا ۇستايتىنىن تاعى دا كورسەتتى. جالپى، اتىراۋدا سويلەگەن سوزىندە ەكونوميكا، ازاماتتاردىڭ ءومىر ءسۇرۋ ساپاسىن جاقسارتۋ، وڭىرلەردى كەشەندى دامىتۋ ماسەلەلەرى مەملەكەت باسشىسىنىڭ تۇراقتى نازارىندا ەكەنىن راستادى»، - دەپ جازدى مەملەكەتتىك كەڭەسشى.

ەسكە سالا كەتەيىك، كەشە اتىراۋدا ۇلتتىق قۇرىلتاي وتكەنىن جازعان بولاتىنبىز.

اۆتور

ابىلايحان جۇماشيەۆ