ەرلان قارين: جاڭارتىلعان كونستيتۋتسيا - ۇلتتىڭ جاڭا ساپاسىن قالىپتاستىرۋ جولى

استانا. KAZINFORM - ق ر مەملەكەتتىك كەڭەسشىسى ەرلان قارين كونستيتۋتسيالىق رەفورمانىڭ ناتيجەلەرى تۋرالى ايتتى.

ەرلان قارين اتاپ وتكەندەي، وسىدان تۋرا ءۇش جىل بۇرىن ەلىمىزدە جالپى ۇلتتىق رەفەرەندۋم ءوتىپ، ازاماتتارىمىزدىڭ كوپشىلىگى كونستيتۋتسيانى جاڭارتۋ تۋرالى باستامانى قولدادى. سونىڭ ناتيجەسىندە اتا زاڭىمىزدىڭ ۇشتەن ءبىرى وزگەردى.

- كونستيتۋتسيالىق رەفورما پرەزيدەنت قاسىم- جومارت توقايەۆتىڭ ەلدى جان- جاقتى جاڭعىرتۋعا ارنالعان ستراتەگيالىق باعدارىن جۇزەگە اسىرۋعا بەرىك ينستيتۋتسيونالدىق نەگىز قالادى. اتاپ ايتقاندا، ءماجىلىس پەن ءماسليحات دەپۋتاتتارىن سايلاۋدىڭ ارالاس جۇيەسى ەنگىزىلدى، ايەلدەر مەن جاستارعا 0 كۆوتا بەلگىلەندى، پارتيالاردى تىركەۋ ءراسىمى جەڭىلدەتىلدى. پرەزيدەنت وكىلەتتىگىنىڭ جەتى جىلدىق ءبىر عانا مەرزىممەن شەكتەلۋى ماڭىزدى جاڭالىقتىڭ ءبىرى بولدى. كونستيتۋتسيالىق سوت قۇرىلىپ، ادام قۇقىقتارىن قورعاۋ تاسىلدەرى كۇشەيتىلدى. اتا زاڭعا جەر جانە ونىڭ قويناۋى حالىققا تيەسىلى دەگەن نورما ەنگىزىلدى. «ۇلتتىق قور - بالالارعا» جوباسى وسى ەرەجەنىڭ ءىس جۇزىندەگى ناقتى كورىنىسىنە اينالدى. وعان سايكەس قازاقستانداعى بارلىق بالانىڭ ەسەپشوتىنا ۇلتتىق قور تابىسىنان قارجى اۋدارىلا باستادى، - دەدى قارين.

ونىڭ سوزىنشە، كونستيتۋتسيالىق رەفورما قازاقستاندا مۇلدە جاڭا ساياسي جاعداي قالىپتاستىرۋمەن قاتار، بۇكىل ايماعىمىز ءۇشىن جاڭا ۇردىسكە جول اشتى.

- ەلىمىزدىڭ ساياسي جۇيەسىن جەتىلدىرۋ ۇدەرىسى ءالى دە جالعاسىپ جاتىر. اۋىل اكىمدەرىن تىكەلەي سايلاۋ ءتاسىلى ەنگىزىلگەننەن بەرى ولاردىڭ قۇرامى تولىق جاڭاردى. بيىلدان باستاپ اۋدان جانە وبلىستىق ماڭىزى بار قالا اكىمدەرى دە تىكەلەي سايلانادى. جالپى العاندا، ەلىمىزدە جىل سايىن جۇزدەگەن سايلاۋ ناۋقانى وتەدى. بۇل ۇدەرىس ەلدەگى قوعامدىق-ساياسي ءومىردىڭ كۇندەلىكتى كورىنىسىنە اينالدى. ەڭ باستىسى، رەفورمالاردىڭ ناتيجەسىندە ەلدە جاڭا ساياسي مادەنيەت قالىپتاسىپ، ازاماتتارىمىزدىڭ قۇندىلىقتار جۇيەسى جاڭعىرىپ جاتىر. وسىلايشا، جاڭارتىلعان كونستيتۋتسيا ۇلتتىڭ جاڭا ساپاسىن قالىپتاستىراتىن تۇبەگەيلى وزگەرىستەردى باستاپ بەردى، - دەپ تۇيىندەدى مەملەكەتتىك كەڭەسشى.