ەرلان قارين ايەلدەر مەن بالالار قۇقىعىن قورعاۋ تۋرالى زاڭ جوباسىنا قاتىستى پىكىر ءبىلدىردى

استانا. KAZINFORM - ق ر مەملەكەتتىك كەڭەسشىسى ەرلان قارين ەلىمىزدەگى ايەلدەر مەن بالالار قۇقىعىن قورعاۋ تۋرالى زاڭ جوباسىنا قاتىستى پىكىر ءبىلدىردى.

«بۇگىن ءماجىلىستىڭ پلەنارلىق وتىرىسىندا ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋگە قاتىستى زاڭ جوباسى ءبىرىنشى وقىلىمدا قابىلداندى. وندا تۇرمىستىق زورلىق-زومبىلىق ماسەلەلەرىن شەشۋدىڭ جان- جاقتى تاسىلدەرى قاراستىرىلعان. بۇل قۇجات پرەزيدەنتتىڭ بىلتىر كۇزدە جاريالاعان جولداۋىن جۇزەگە اسىرۋ اياسىندا ازىرلەندى. جالپى، وسى جوباعا سايكەس ءتۇرلى زاڭ اكتىلەرىنە 70 تۇزەتۋ ەنگىزۋ كوزدەلىپ وتىر. سونىڭ ىشىندە، وتباسىلارعا كومەك كورسەتۋ ينفراقۇرىلىمىن قالىپتاستىرۋعا باعىتتالعان وزگەرىستەردى، سونداي- اق تۇرمىس سالاسىنداعى قىلمىستار جانە بالالارعا قارسى جاسالعان زورلىق-زومبىلىقتىڭ بارلىق ءتۇرى ءۇشىن جازانى كۇشەيتۋدى اتاپ وتۋگە بولادى. ماسەلەن، ادامدى ۇرىپ-سوققانى، دەنساۋلىققا جەڭىل، اۋىرلىعى ورتاشا جانە اۋىر زيان كەلتىرگەنى، ازاپتاپ-قيناعانى ءۇشىن قىلمىستىق جاۋاپكەرشىلىك ەنگىزىلدى جانە كۇشەيتىلدى»، - دەپ جازدى ەرلان قارين Telegram-دا.

ايتۋىنشا، بۇدان بولەك، تۇرمىستىق زورلىق-زومبىلىق فاكتىلەرىن انىقتاۋعا جانە الدىن الۋعا باعىتتالعان ءبىرقاتار شارا كوزدەلگەن.

«زاڭ جوباسىن دەپۋتاتتار مەملەكەتتىك ورگاندارمەن، ساراپشىلار قاۋىمداستىعىمەن جانە قوعامدىق ۇيىمدارمەن بىرلەسىپ ازىرلەدى. بۇل قۇجاتتى دايىنداۋعا بالالار قۇقىعى جونىندەگى ۋاكىل دينارا زاكييەۆا بەلسەنە اتسالىستى»، - دەپ اتاپ ءوتتى.

بۇعان دەيىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەن ىلىسپە قۇجات ءبىرىنشى وقىلىمدا ماقۇلدانعانىن جازعان بولاتىنبىز.

اۆتور

ەلميرا ورالبايەۆا