ەرلان قارين اسكەري-پاتريوتتىق تاربيە سالاسىن جەتىلدىرۋگە قاتىستى تاپسىرما بەردى

استانا. KAZINFORM - اقوردادا مەملەكەتتىك كەڭەسشى ەرلان قاريننىڭ ءتوراعالىق ەتۋىمەن اسكەري-پاتريوتتىق تاربيە بەرۋ ماسەلەسى جونىندە جيىن ءوتتى.

باسقوسۋعا قورعانىس، مادەنيەت جانە اقپارات، وقۋ-اعارتۋ، عىلىم جانە جوعارى ءبىلىم مينيسترلىكتەرىنىڭ باسشىلىعى، باس پروكۋراتۋرا، پرەزيدەنت اكىمشىلىگى قۇرىلىمدىق بولىمشەلەرىنىڭ وكىلدەرى مەن پارلامەنت دەپۋتاتتارى قاتىستى.

جيىندا مەملەكەت باسشىسىنىڭ اسكەري-پاتريوتتىق تاربيە سالاسىنداعى باستامالارىن ءتيىمدى جۇزەگە اسىرۋ ماسەلەلەرى تالقىلاندى.

ەرلان قارين مەملەكەتتىك ورگاندار ىشكى ساياسات باعىتىنداعى جۇمىستارى اياسىندا اسكەري-پاتريوتتىق تاربيە بەرۋ بويىنشا جەكەلەگەن ءىس-شارالار ۇيىمداستىرۋدى قولعا العانىنا نازار اۋداردى.

اتاپ ايتقاندا، مەكتەپتەردە تاربيە جۇمىسىنىڭ جاڭا باعدارلاماسى جۇزەگە اسىرىلا باستادى، پارلامەنت دەپۋتاتتارى ءتيىستى زاڭ جوباسىن قاراستىرىپ جاتىر، قورعانىس مينيسترلىگى جاستارعا اسكەري- پاتريوتتىق تاربيە بەرۋدىڭ 2030 -جىلعا دەيىنگى تۇجىرىمداماسىن ازىرلەدى.

مەملەكەتتىك كەڭەسشى اتقارىلىپ جاتقان جۇمىستى جۇيەلەۋ جانە ءبىر جەردەن ۇيلەستىرۋ قاجەت ەكەنىن ايتتى. بۇل رەتتە ەرلان قارين، ەڭ الدىمەن، تۇجىرىمدامالىق نەگىزدەمەنى ايقىنداۋ، قۇقىقتىق بازانى قالىپتاستىرۋ جانە بارلىق مەملەكەتتىك ورگاندار مەن ينستيتۋتتاردىڭ ءبىرىڭعاي ءىس-قيمىل جوسپارىن ازىرلەۋ مىندەتتەرىن ايقىندادى.

جيىن سوڭىندا مەملەكەتتىك كەڭەسشى جاۋاپتى مەملەكەتتىك ورگاندارعا ناقتى تاپسىرمالار بەرىپ، اسكەري-پاتريوتتىق تاربيە سالاسىنداعى جۇمىس تاسىلدەرىن جەتىلدىرۋ ءۇشىن مۇنداي باسقوسۋلار تۇراقتى تۇردە وتكىزىلەتىنىن اتاپ ءوتتى.

اۆتور

ەلميرا ورالبايەۆا