مەملەكەت باسشىسىنىڭ تاپسىرماسى بويىنشا ۆيتسە-پرەزيدەنت ەرلان قارين حالىقارالىق كينوجوبانىڭ ءتۇسىرىلىم توبى مۇشەلەرىمەن كەزدەستى. كەزدەسۋگە الەمگە ايگىلى رەجيسسەر ءارى كينواكتەر دجەكي چان، سونداي-اق شەتەلدىك جانە قازاقستاندىق پروديۋسەرلەر ەسموند رەن، رۇستەم وماروۆ، يگور ساي جانە ورىنباسار قۇدايبەرگەنوۆ قاتىستى.
- كەزدەسۋ بارىسىندا كينەماتوگرافيا سالاسىنداعى حالىقارالىق ىنتىماقتاستىقتى دامىتۋ ماسەلەلەرى، سونداي-اق بىرلەسكەن كينوجوبالاردى ودان ءارى جۇزەگە اسىرۋ مۇمكىندىكتەرى تالقىلاندى،- دەلىنگەن حابارلامادا.
ەرلان قارين پرەزيدەنت قاسىم-جومارت توقايەۆتىڭ كرەاتيۆتى يندۋستريانى دامىتۋعا جانە ازاماتتاردىڭ شىعارماشىلىق الەۋەتىن پاش ەتۋ ءۇشىن جاعداي جاساۋعا ەرەكشە كوڭىل ءبولىپ وتىرعانىن اتاپ ءوتتى.
ۆيتسە-پرەزيدەنت ءىرى حالىقارالىق كينوجوبالاردىڭ قازاقستاندا ءتۇسىرىلۋى وتاندىق كينويندۋستريانىڭ دامۋىنا، جەرگىلىكتى مامانداردىڭ كاسىبي مۇمكىندىكتەرىن شىڭداۋعا جانە حالىقارالىق كينووندىرىس ءۇشىن ەلىمىزدى الەۋەتتى الاڭ رەتىندە تانىتۋعا ىقپال ەتەتىنىن اتاپ ءوتتى.
كەزدەسۋدە كينو سالاسىنداعى جاڭا تەحنولوگيالاردى دامىتۋ باعىتىنا دا ەرەكشە نازار اۋدارىلدى. ەرلان قارين مەملەكەت باسشىسىنىڭ شەشىمىمەن جاريالانعان بيىلعى سيفرلاندىرۋ جانە جاساندى ينتەللەكت جىلىندا ەلوردادا Astana AI Film Festival وتكەنىن جەتكىزدى. وعان الەمنىڭ 125 ەلىنەن 8 مىڭ ءوتىنىم كەلىپ ءتۇستى. قاتىسۋشىلاردىڭ اۋقىمى مەن گەوگرافياسى جاعىنان بۇل فەستيۆال AI - كينوعا ارنالعان الەمدەگى ەڭ ءىرى ءىس-شارا رەتىندە تانىلدى.
كەزدەسۋ سوڭىندا ەرلان قارين دجەكي چانعا قازاقستانعا دەگەن ايرىقشا ىقىلاسى ءۇشىن العىس ايتىپ، جوباعا قاتىسۋشىلاردىڭ الداعى شىعارماشىلىق جۇمىسىنا تابىس تىلەدى.