ەركىن تۇقىموۆ: تۇركى مەملەكەتتەرى ۇيىمىن ساياسيلاندىرماۋىمىز كەرەك
ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ تۇركى مەملەكەتتەرى ۇيىمىن ساياسيلاندىرماۋعا شاقىردى. ونىڭ پىكىرىنشە، ەلدەر ەكونوميكا، ينۆەستيتسيا بويىنشا دامۋى كەرەك، دەپ حابارلايدى قازاقپارات ءتىلشىسى
«گەوساياسي تۇراقسىزدىق، قاراما-قايشىلىقتار بولىپ جاتقاندا بىزگە پروبلەما قاجەت ەمەس. بىزگە ەكونوميكانى دامىتىپ، ينۆەستيتسيالار تارتۋ قاجەت. بۇگىندە تۇركى مەملەكەتتەرى ۇيىمىنىڭ زەرتتەۋ ورتالىعىن قۇرۋ، كادرلاردى دايارلاۋ تۋرالى جاقسى ۇسىنىستار ايتىلىپ جاتىر. ءبىز دوكتور يلمازبەن سويلەسكەن كەزدە، ول ناقتى جوبالاردان باستاۋ كەرەك ەكەنىن ايتتى. تۇركى مەملەكەتتەرى ۇيىمى بىرەۋگە قارسى باعىت ۇستانبايدى، ءبىزدىڭ ۇيىمدى ساياساتتاندىرماۋ كەرەك. ءبىز پىكىرتالاستى پراگماتيكالىق جانە ءبىزدىڭ مۇددەمىزگە ساي جۇرگىزىپ جاتىرمىز»، - دەدى ەركىن تۇقىموۆ ەلوردادا ءوتىپ جاتقان تۇركى مەملەكەتتەرى ۇيىمىنا مۇشە ەلدەر وكىلدەرىمەن كەزدەسۋدە.
سونداي-اق سپيكەر تۇركى مەملەكەتتەرى ۇيىمىنىڭ ساراپتامالىق قوعامداستىعى ىنتىماقتاستىقتى دامىتۋعا جاردەمدەسۋدە شەشۋشى ءرول اتقاراتىنىن ايتتى.
«ءبىز كۇش-جىگەرىمىزدى بىرىكتىرۋ ءۇشىن ەلىمىزدىڭ عىلىمي-ساراپتامالىق توپتارىنىڭ ءوزارا ءىس-قيمىلىن كەڭەيتۋ كەرەك. ءدال وسى ساراپتامالىق دەڭگەيدە بار پروبلەمانى ءتۇسىنىپ، ونى شەشۋدىڭ ءتيىمدى تاسىلدەرىن ازىرلەۋ قاجەت. ساۋدا-ەكونوميكالىق، كولىكتىك-لوگيستيكالىق، ينفراقۇرىلىمدىق سيپاتتاعى زەرتتەۋ باعىتتارىن دامىتۋ قاجەت. مىقتى ساراپتامالىق ديالوگ تۇركى مەملەكەتتەرى ۇيىمىنا مۇشە ەلدەردىڭ ەكونوميكاسىن دامىتۋعا ىقپال ەتەتىنىنە سەنىمدىمىن»، - دەيدى ينستيتۋت باسشىسى.
بۇعان دەيىن حابارلاعانىمىزداي، ەلوردادا تۇركى مەملەكەتتەرى ۇيىمىنا مۇشە جانە بايقاۋشى مەملەكەتتەردىڭ رەسمي سىرتقى ساياسي زەرتتەۋلەر ورتالىقتارىنىڭ 9- كەزدەسۋى ءوتىپ جاتىر.