ەركىن كۇرەستەن تۇڭعىش الەم چەمپيونى ريزابەك ايتمۇحان وليمپيادالىق سالماققا اۋىستى
ەركىن كۇرەستەن قازاقستان كومانداسىنىڭ باس باپكەرى ماديار قۇرامىسوۆ بالۋانداردىڭ بيىلعى ماۋسىمداعى كورسەتكىشىن قورىتىندىلاپ، قۇراماداعى وزگەرىستەر تۋرالى ايتتى، دەپ حابارلايدى Kazinform ۇلتتىق وليمپيادالىق كوميتەتتىڭ باسپا ءسوز قىزمەتىنە سىلتەمە جاساپ.
بيىل وتاندىق ەركىن كۇرەس شەبەرلەرى ازيا چەمپيوناتى، الەم بىرىنشىلىگى مەن ازيا ويىندارى سىندى ءىرى باسەكەلەردە باق سىناعان بولاتىن.
«الەم چەمپيوناتىنان ءبىر التىن، ءبىر قولامەن ورالدىق. ريزابەك ايتمۇحاننىڭ اراعا جىلدار سالىپ تاريحتى جاڭارتقانىن بىلەسىزدەر. ازامات داۋلەتبەكوۆ قولا مەدالمەن بىرگە، وليمپيادا ويىندارىنىڭ ليتسەنزياسىن جەڭىپ الدى. بىزگە ءالى دە جولداما كەرەك. جىلدىڭ سوڭعى جاتتىعۋ جيىنىن بالۋاندار تاۋدا وتكىزەدى. 18 كۇن بويى تاۋدا جاتتىعامىز. جاڭا جىلدا جاڭا جارىستار كۇتىپ تۇر»، - دەدى باس باپكەر.
ماديار قۇرامىسوۆتىڭ ايتۋىنشا، الداعى ماۋسىم وتە جاۋاپتى بولماق.
«ءساۋىر ايىندا بىشكەكتە ازيا ايماقتىق ليتسەنزيالىق تۋرنيرى وتەدى. سول باسەكەدە تاعى دا ەكى جولداما جەڭىپ الۋدى ماقسات ەتىپ وتىرمىز. ءبىزدىڭ بالۋاندار ءۇشىن 57 جانە 65 كەلىدە ليتسەنزيا الۋ قيىن بولماق. سەبەبى، بۇل سالماقتاعى باسەكەلەستىك الەم بويىنشا وتە جوعارى. اتالعان تۋرنيرگە ۇلكەن دايىندىقپەن بارۋدى جوسپارلاۋدامىز. ودان بولەك، رەيتينگىلىك تۋرنيرلەر مەن قازاقستان چەمپيوناتى دا بار»، - دەدى قۇرامىسوۆ.
قاڭتار ايىندا استانادا وتەتىن قازاقستان بىرىنشىلىگىندە ليتسەنزيالىق تۋرنيرگە قاتىساتىن بالۋاندار بەلگىلى بولادى. سول سىندا الەم چەمپيونى ريزابەك ايتمۇحاننىڭ دا جاڭا سالماقتاعى اۋسەلەسى انىقتالادى.
«ريزابەك وليمپيادالىق سالماق سانالاتىن 97 كەلىگە اۋىستى. قازىرگى تاڭدا ازامات داۋلەتبەكوۆپەن بىرگە وسەتيادا جاتتىعىپ جاتىر. بۇل سالماقتا الىشەر ەرعالي سىندى بالۋانىمىز بارىن دا بىلەسىزدەر. كىم مىقتى ەكەنى ۇلتتىق چەمپيوناتتا شەشىلەدى. سول باسەكەدە كىم جەڭسە، ليتسەنزياعا سول تالاسادى»، - دەپ قورىتىندىلادى ءسوزىن باس باپكەر.
اۆتور كۇنسۇلتان وتارباي