رەكوردتىق مولشەردە باۋىرساق پىسىرگەن قازاق اۋىلى گيننەسكە ەندى

استانا. قازاقپارات - بۇل رەكوردتى ورناتۋ ءۇشىن قوستاناي وبلىسى قامىستى اۋىلىنىڭ تۇرعىندارى «باۋىرساق-فەست» فەستيۆالىن ۇيىمداستىرعان. وعان 60 ۇيىم قاتىسقان، دەپ حابارلايدى qazaqstan.tv ارناسى.

رەكوردتى راستاۋ ءۇشىن اۋدانعا قازاقستان رەكوردتار كىتابىنىڭ رەسمي وكىلى كەلگەن. اۋىل تۇرعىندارى بارلىعى 2339 كەلى 650 گرام باۋىرساق ءپىسىرىپ ۇلگەرگەن. ايتا كەتەيىك، بۇرىن-سوڭدى ەلىمىزدە مۇنداي كولەمدە باۋىرساق پىسىرىلگەن ەمەس.

ەسكە سالا كەتەيىك، بۇل قوستانايلىقتاردىڭ ءبىرىنشى الەمدىك رەكوردى ەمەس. وتكەن جىلى ولار ءبىر كۇندە 2300 قار ادامىن جاساپ، گيننەستىڭ رەكوردتار كىتابىنا ەنگەن بولاتىن.

«وسىنداي ءىس-شارالاردىڭ اۋدان كولەمىندە ۇيىمداستىرىلعانى وتە جاقسى. بارلىعىمىز جينالىپ، قاتىسا الامىز. وتە قىزىقتى. ءبىزدى ءبىر ماقسات بىرىكتىرەدى، ءوڭىرىمىزدى جەرگە قاراتپاۋعا تىرىسامىز»، دەيدى اۋىل تۇرعىنى.