رەكورد: تالدىقورعاندا ءبىر مەزەتتە 50 ءسابيدىڭ تۇساۋى كەسىلدى

تالدىقورعان. KAZINFORM - جەتىسۋ وبلىسىندا مادەنيەت جانە ۇلتتىق سالت-ءداستۇر كۇنىنە وراي تالدىقورعانداعى «جاستار» سپورت سارايىندا ءبىر مەزەتتە 50 ءسابيدىڭ تۇساۋى كەسىلدى. بالاقايلاردىڭ تۇساۋىن وڭىردەگى ارداگەرلەر، مادەنيەت، ونەر، ادەبيەت جانە جۋرناليستيكا سالاسىنىڭ قايراتكەرلەرى، اتاقتى سپورتشىلار، بىلىكتى دارىگەرلەر مەن تانىمال تۇلعالار كەستى.

العاش ءتاي-ءتاي قادامىن جاساعان بالالاردىڭ ىشىندە تالدىقورعاندىق ۇستازدار وتباسى نۇرجان قاميەۆ پەن گۇلنۇر داۋرەنبەكوۆانىڭ دا كىشكەنتاي ءسابيى بار.

«ءبىر جاسار بالامىزدى ايتۋلى شاراعا ارنايى الىپ كەلدىك. ەكى قىزدان كەيىن دۇنيەگە كەلگەن ۇلىمىزعا مۇراگەر دەپ ات قويعانبىز. ناۋرىزدىڭ ونكۇندىگى اياسىندا وسى ۇلكەن اۋقىمداعى تۇساۋكەسەردە ءسابيىمىزدىڭ ومىرگە العاش قادام جاساعىنىن جاقسى ىرىمعا بالايمىز. ناۋرىزدى وسىلاي ون كۇن بويى ۇلتتىق مازمۇندا اتاپ ءوتۋ باستاماسىن قولدايمىز. بارشا جۇرتشىلىقتى ناۋرىز مەرەكەمىنەن قۇتتىقتايمىز»، - دەيدى گۇلنۇر داۋرەنبەكوۆا.

ايتا كەتەيىك، اتالعان ءىس-شارا ەلىمىزدە العاش رەت وتكىزىلىپ وتىرعاندىقتان قازاقستاننىڭ رەكوردتار كىتابىنا ەنگىزىلدى.

راسىمگە ارنايى «كينەس» رەكوردتاردى تىركەۋ دەپارتامەنتىنىڭ ديرەكتورى باقىتجان تاستۇلەكوۆ قاتىسىپ، تۇساۋى كەسىلگەن سابيلەردىڭ اتا-انالارىن قۇتتىقتادى.

«50 بالانىڭ ءبىر مەزەتتە بىردەي تۇساۋكەسەرى وتكىزىلگەنى جايلى فاكتىنىڭ قازاقستاننىڭ رەكوردتار كىتابىنا ەنگىزىلگەنىن راستايتىن سەرتيفيكات تابىستاماقپىن. بالالاردىڭ جولى اشىق بولسىن!»، - دەگەن تىلەگىن جەتكىزدى ب. تاستۇلەكوۆ.