رەكتور تاعايىندايتىن كەزدە ونىڭ بۇرىن ەشقانداي داۋ-دامايعا ىلىكپەگەنىنە، ابىروي-بەدەلىنە قارايمىز - ساياسات نۇربەك

استانا. KAZINFORM - وتاندىق ج و و رەكتورلارى ءبىر لاۋازىمدا ەكى مەرزىم عانا جۇمىس ىستەي الادى. بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ايتىپ بەردى.

«ءساۋىر ايىنان باستاپ رەكتورلىققا ءوتىنىم بەرگەن ۇمىتكەرلەر ەكى مەرزىم عانا جۇمىس ىستەي الاتىنداي زاڭنامالىق وزگەرىستەر ەنگىزدىك. ءبىر مەرزىم ءۇش جىلدان، ەكى مەرزىم 6 جىل بولادى. ودان كەيىن باسقا وقۋ ورىندارىنا اۋىستىرىلادى»، - دەپ ءتۇسىندىردى س. نۇربەك ورتالىق كوممۋنيكاتسيالار قىزمەتىندە.

سونىمەن بىرگە، رەكتورلىققا قويىلاتىن تالاپتار دا كۇشەيتىلدى.

ەندى بۇل قىزمەتكە رەكتورلىققا اكادەميالىق سالادا كەمىندە 10 جىل تاجىريبەسى بار، ونىڭ ىشىندە 5 جىل باسقارۋشى لاۋازىمدا جۇمىس ىستەگەن، عىلىمي دارەجەسى بار، اعىلشىن ءتىلىن بىلەتىن ۇمىتكەرلەر قابىلدانادى.

«بۇرىن الەۋمەتتىك جەلى مەن ب ا ق-تا جاعىمسىز جايتتارعا، مورالدىق، رەپۋتاتسيالىق سىن-قاتەرگە ۇشىراماعان ادامدار ۇمىتكەر بولا الادى»، - دەپ تولىقتىردى مينيستر.

تىلشىلەر بۇعان دەيىن ون جىل بويى ءبىر لاۋازىمدا وتىرعان رەكتورلارعا جاڭا زاڭ قالاي اسەر ەتەتىنىن سۇرادى.

«جاڭادان ەنگىزىلگەن زاڭ بۇرىن قابىلدانعان شەشىمدەرگە اسەر ەتە المايدى. وسى وزگەرىستەرگە دەيىن تاعايىندالعان رەكتورلار كەلىسىمشارتى اياقتالعان سوڭ عانا جاڭا تالاپتارمەن جۇمىسىن جالعاستىرادى»، - دەيدى س. نۇربەك.

اۆتور

ايجان سەرىكجان قىزى