ەرەجە بۇزاتىندارمەن كۇرەستىڭ جاڭا ءتاسىلى: قازاقستاندا جاسىرىن پاترۋل جۇيەسى ەنگىزىلدى

استانا. KAZINFORM - جۇرگىزۋشىلەر ەندى جول ەرەجەسىن بۇزاتىن بولسا، كامەرا جوق جەردە دە ايىپپۇل ارقالاۋى مۇمكىن. بۇل تۋرالى ق ر ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ ايتتى.

«جەرگىلىكتى اتقارۋشى ورگانداردىڭ قولداۋىمەن جول قاۋىپسىزدىگىن قامتاماسىز ەتۋ سالاسىنا سيفرلىق شەشىمدەر ەنگىزىلۋدە. الايدا، بۇگىندە بارلىق كامەرالار كوبىنە قالالاردا ورنالاسقان. قالا سىرتىنداعى قاۋىپسىزدىك ماسەلەلەرىن شەشۋ ءۇشىن پاترۋلدىك اۆتوكولىكتەردى جول ەرەجەلەرىن بۇزۋدى تىركەيتىن بورتتىق جۇيەلەرمەن جابدىقتادىق. قازىر ولاردىڭ سانى 300 گە جۋىق. ءبىر ەكيپاجدىڭ ونىمدىلىگى 15 پاترۋلدىڭ جۇمىسىمەن سايكەس كەلەدى. تۇرعىندار ولاردىڭ جۇمىسى تۋرالى بىلەدى جانە ولاردىڭ جولدا ءجۇرۋى جۇرگىزۋشىلەردى تارتىپكە كەلتىرۋدە»، - دەدى اكىمشىلىك پوليسيا كوميتەتىنىڭ ءتوراعاسى و ك ق الاڭىندا وتكەن باسپا ءسوز ءماسليحاتىندا.

سونداي- اق قايسار سۇلتانبايەۆ كامەرا جانە پاترۋلدىك كولىك جوق جەردە ەرەجە بۇزاتىندارمەن كۇرەستىڭ جاڭا ءتاسىلى ەنگىزىلىپ جاتقانىن ايتتى.

«جۇرگىزۋشىلەر جولدا پاترۋلدىك كولىك كوزدەن تاسا بولعاندا تىيىم سالىنعان ۋچاسكەلەردە جىلدامدىقتى اسىرىپ وتىرادى، ودان قالدى، باسىپ وزۋ سياقتى بۇزۋشىلىقتارعا دا جول بەرەدى. قالا سىرتىنداعى جولداردى قامتۋ ماقساتىندا جاسىرىن پاترۋلدەردى ەنگىزدىك. ياعني، سايكەستەندىرۋ بەلگىلەرى جوق پوليسيا كولىگىنىڭ سالونىندا اۆتوماتتى كامەرالار ورناتتىق. قازىرگى ۋاقىتتا جاسىرىن پاترۋلدەۋ رەجيمىندە پوليسيانىڭ 10 شاقتى كولىگى جۇمىستى باستاپ كەتتى. جىل سوڭىنا دەيىن ولاردىڭ سانىن كوبەيتۋدى جوسپارلاپ وتىرمىز. ولاردىڭ ماقساتى مۇمكىندىگىنشە كوپ ايىپپۇل سالۋ ەمەس، قالا ماڭىنداعى جولدا جۇرگىزۋشىلەردى تارتىپكە كەلتىرۋ»، - دەدى كوميتەت باسشىسى.

سونداي- اق ول ەلدى مەكەندەردىڭ ىشىندە وسى تەكتەس كامەرالار اۆتوبۋستاردىڭ سالوندارىندا دا جاسىرىن ورناتىلاتىنىن ايتتى.

«قازىرگى كۇندە 5 مارشرۋتتىق اۆتوبۋس جابدىقتالعان. جىل سوڭىنا دەيىن ولاردىڭ سانىن كوبەيتۋدى جانە جەدەل جاردەم كولىكتەرىنە دە ورناتۋدى جوسپارلاپ وتىرمىز. بۇل كولىك جۇرگىزۋ مادەنيەتىن ارتتىرۋعا جانە جازانىڭ بۇلتارتپاۋشىلىق ءپرينتسيپىن قامتاماسىز ەتۋگە مۇمكىندىك بەرەتىن بولادى»، - دەدى سپيكەر.

قايسار سۇلتانبايەۆتىڭ ايتۋىنشا، حالىقارالىق تاجىريبە پوليتسيانىڭ عانا شارالارىمەن جول قاۋىپسىزدىگىن ارتتىرۋعا قول جەتكىزۋ مۇمكىن ەمەستىگىن كورسەتكەن. ال، مامانداردىڭ پىكىرىنشە، جول وقيعالارىنىڭ باسىم كوپشىلىگى بولجامدى، ياعني ولاردىڭ الدىن الۋعا بولادى. سوندىقتان جول- كولىك وقيعالارىن، ادام قاتەلىكتەرىنىڭ سالدارىن بولدىرمايتىن قاۋىپسىز ينفراقۇرىلىم سالۋ باستى ماقسات بولىپ وتىر.

ايتا كەتەيىك، جىل باسىنان بەرى ەلىمىزدە 22 مىڭنان استام جول اپاتى تىركەلىپ، وندا 2 مىڭ ادام قازا بولدى. سونداي- اق 2024 -جىلى 21 مىڭعا جۋىق ماس جۇرگىزۋشى ۇستالعان.