رۋحتى داۋىسىمەن 20 جىل اسكەري شەرۋدى جۇرگىزگەن ديكتورمەن سۇحبات

استانا. KAZINFORM - تىڭدارمان ءتۇرىن بىلە بەرمەسە دە، داۋىسىنان جازباي تانيتىن تۇلعالار بار. سولاردىڭ ءبىرى - 20 جىلدان بەرى اسكەري شەرۋدى جۇرگىزىپ كەلە جاتقان ازامات قاناپيا.

«بۇگىن LIVE» ستۋدياسىنا قوناق بولعان ديكتور ءىسىنىڭ قىر-سىرىن اقتاردى.

- ەڭ العاشقى شەرۋ 2005 -جىلى بولدى عوي دەيمىن. بيىل مەندە مەرەيتوي دەسە دە بولادى. سەبەبى، اسكەري شەرۋدى جۇرگىزىپ جۇرگەنىمە 20 جىل بولىپتى. 20 جىلدان بەرى بيىل 13-پارادتى جۇرگىزىپ وتىرمىن. ەڭ العاشقى پارادتى سول كەزدەگى اقپارات جانە مادەنيەت مينيسترلىگى مەن قورعانىس مينيسترلىگى بىرىگىپ ۇيىمداستىردى. سوسىن پارادتى جۇرگىزەتىن ادامداردى شاقىرتتى. ول كەزدەگى مادەنيەت ءمينيسترى «كوشپەندىلەر» كينوسىن كورگەن دە، ونداعى داۋىستى ۇناتقان بولۋى كەرەك. سودان كەيىن وسى داۋىس پارادتى جۇرگىزەدى دەپ، مەنى شاقىرعان. ال ورىسشا جۇرگىزۋگە 3 ادامدى شاقىرتتى. ولاردىڭ ءارقايسىسىن تىڭداپ كورىپ، ىشىنەن بىرەۋىن تاڭدادى، - دەيدى ديكتور.

اسكەري پاراد جۇرگىزۋشىسى ءار شەرۋدە ميكروفون تىزگىنىن ۇستاعان سايىن قوبالجيتىنىن جاسىرمادى.

- العاشقى پارادتا عانا ەمەس، قوبالجۋ بارلىق جەردە بولادى. مىسالى، بيىلعى پارادتا وقيتىن ءماتىننىڭ ءوزى 77 بەت. ول جەردە جاڭىلماۋ كەرەكسىڭ. كەيدە وقيتىن ءماتىنىڭ ۇزاق بولىپ كەتسە، ۇلگەرۋ قاجەت. ورايىن كەلتىرىپ، دەر كەزىندە توقتاپ، مىنبەر الدىنان ءوتىپ بارا جاتقان اسكەريلەردى ايتىپ ۇلگەرۋىڭ كەرەك. ءماتىندى وقىپ قانا قويماي، ونىڭ الاڭداعى ءىس-ارەكەتكە ساي كەلۋىن تۇگەلدەي باقىلاپ وتىراسىڭ. سوندىقتان جاۋاپكەرشىلىگى وتە اۋىر. ول جەردە قۇر وقىپ قانا قويمايسىڭ. وقىعان كەزدە ول تىڭدارماننىڭ قۇلاعىنا جەتىپ، ولار وزىنە رۋح الۋ كەرەك. سەنىڭ نەگىزگى مىندەتىڭ سول بولعاندىقتان، ءاربىر ادامعا وي سالىپ، جۇرەگىنە جەتكىزە ءبىلۋ كەرەك، - دەيدى ازامات قاناپيا.

ازامات قاناپيانىڭ ەسىمىن اسكەري شەرۋلەردە عانا ەستىمەيسىز. تەلەديداردى قوسا قالساڭىز، قازاقشا دىبىستالعان ەكى ءفيلمنىڭ بىرىنەن ءدال وسى قوڭىر ءۇندى تىڭداۋعا بولادى. مامان ءوزىنىڭ ديكتورلىق مانسابىنا قالاي كەلگەنىن دە ايتىپ بەردى.

- مەن نەگىزى اكتەرمىن. تەاتردا جۇمىس ىستەدىم. ال بۇل جۇمىسقا شامامەن 23-24 جاسىمدا كەلىپپىن. ەڭ باسىندا «حابار»، «ەلارنا» تەلەارنالارىندا فيلمدەردى، تۇرىك سەريالدارىن قازاقشالاپ باستادى عوي. ءبىز دە سول العاشقى تولقىنعا كەلىپ تۇستىك. سودان كەيىن وسى سالاعا ءبىرىڭعاي كىرىسىپ كەتتىك. كەيدە اكتەرلىكتى دە ساعىنامىن، - دەيدى ول.

ديكتور كەيدە ءوزىن داۋىسىنان تانىپ جاتاتىنداردىڭ ءجيى جولىعاتىنىن جەتكىزدى.

- كەيدە تەلەفونعا جاۋاپ بەرگەندە تاپسىرىستار ءتۇسىپ، ارنايى داۋىسپەن سويلەۋگە تۋرا كەلەدى. سول كەزدە قاسىڭدا ەستىپ قالعان ادام بىردەن تانىپ جاتادى. اۋىزەكى تىلدە بىلدىرتپەۋگە تىرىسامىن. ءبىراق سوعان قاراماستان بىردەن تانيتىندار دا تابىلىپ جاتادى، - دەيدى مامان.

كاسىبي مامان ارىپتەستەرىنە دۇرىس داۋىس قويۋدىڭ بىرنەشە تەحنيكاسىن ءدا تۇسىندىردى.

- جۇمىرتقا ادامنىڭ داۋىسىنا ايتارلىقتاي اسەر ەتپەسە دە، ول ادامعا كۇش بەرەدى. ءماتىندى مانەرلەپ وقىعان كەزدە كوبىنە دەممەن جۇمىس ىستەۋ كەرەك بولادى. ونداي كەزدە ديافراگمادا كۇش كوپ بولۋ كەرەك، ياعني، دەمنىڭ ۇستىنە وتىرىپ الىپ سويلەگەن كەزدە ادام شارشامايدى جانە تاماعىنا دا كوپ سالماق تۇسپەيدى. سويلەگەن كەزدە كۇش بولادى. ال جۇمىرتقا ادامعا سول كۇشتى بەرەدى. نەگىزىنەن ادامعا كۇش-قۋات بەرەتىن ەڭ باستى نارسە - بۇل دەم. ودان كەيىن تەحنيكا. ارتيكۋلياتسياعا كەلگەن كەزدە ديكسياعا ارنالعان كوپتەگەن جاتتىعۋ بار. مىسالى، «جزدرا، جزدرە» دەگەن سەكىلدى. ارىپتەردى ادەيىلەپ شىعارىپ، اپپاراتتى ءتىرىلتىپ الىپ، سوسىن بارىپ جۇمىس ىستەۋ كەرەك. ال داۋىستى اشۋعا كەلەر بولساق، ءوزىڭ ايتا الاتىن انىڭە قوسىلىپ، ونى بار داۋىسىڭمەن، ءبىراق تاماققا سالماي ايتساڭ، داۋىسىڭ اشىلادى. اشىلعان داۋىسپەن ارى قاراي جۇمىس ىستەۋ دە وڭاي بولادى، - دەيدى ول.

ەسكە سالا كەتەيىك، ەلوردادا اسكەري شەرۋگە بايلانىستى بىرنەشە كوشە ۋاقىتشا جابىلادى.

اۆتور

ارۋجان ماحمۋت