رەفەرەندۋم: داۋىس بەرۋ بارىسىنا كىمدەر بايقاۋشى بولا الادى

استانا. KAZINFORM - ورتالىق رەفەرەندۋم كوميسسياسىنىڭ وتىرىسىندا كوميسسيا مۇشەسى اناستاتسيا شەگورسوۆا رەفەرەندۋم بارىسىندا كىمدەردى بايقاۋشى بولا الاتىنىن ايتتى.

«رەفەرەندۋم كوميسسيا مۇشەلەرى مەن داۋىس بەرۋگە قۇقىعى بار ازاماتتاردان باسقا رەفەرەندۋم ۋچاسكەسىندە قاتىسۋشىلاردىڭ تاعى 4 ساناتى بولۋى مۇمكىن. 1-سانات - اككرەديتتەلگەن قوعامدىق بىرلەستىكتەردىڭ، كوممەرتسيالىق ەمەس ۇيىمداردىڭ بايقاۋشىلارى. سايلاۋ مەن رەفەرەندۋمدى بايقاۋعا قاتىسقىسى كەلەتىن قوعامدىق بىرلەستىكتەر مەن كوممەرتسيالىق ەمەس ۇيىمدار ورتالىق جانە اۋماقتىق سايلاۋ ۋچاسكەلەرىندە اككرەديتتەۋ راسىمىنەن وتەدى. اككرەديتتەۋ 1 جىلعا بەرىلەدى. بۇگىنگى تاڭدا 13 رەسپۋبليكالىق قوعامدىق ۇيىم جانە 231 وڭىرلىك ۇيىم اككرەديتتەلگەن. رەسپۋبليكالىق قوعامدىق بىرلەستىكتەر ەلىمىزدىڭ بارلىق 20 وڭىرىندە بايقاۋدى جۇزەگە اسىرا الادى. وڭىرلىك ۇيىمدار اككرەديتتەلگەن وبلىستا جانە ولاردىڭ فيليالدارى بار وبلىستاردا بايقاۋدى جۇزەگە اسىرا الادى»، - دەدى ول.

ونىڭ اتاپ وتۋىنشە، داۋىس بەرۋ بارىسىنا ساياسي پارتيالار دا بايقاۋشى بولا الادى. ءبىراق، ولار دا اككرەديتتەۋدەن ءوتۋى ءتيىس. بۇل رەتتە AMANAT پارتياسى عانا اككرەديتتەۋدەن ءوتتى. باسقا ساياسي پارتيالار ورتالىق رەفەرەندۋم كوميسسياسىنا ءوتىنىم بەرگەن جوق.

2- سانات - شەت مەملەكەتتەر مەن حالىقارالىق ۇيىمداردىڭ اككرەديتتەلگەن بايقاۋشىلارى. 30 شەت مەملەكەتتەن جانە 4 حالىقارالىق ۇيىمنان بارلىعى 177 بايقاۋشى رەسمي تىركەۋدەن ءوتتى. شەتەلدىك بايقاۋشىلاردىڭ اۋدارماشىمەن بىرگە جۇرۋگە قۇقىعى بار.

3- سانات - شەتەلدىك ب ا ق وكىلدەرى. ولاردى سىرتقى ىستەر مينيسترلىگى اككرەديتتەيدى. 38 ەلدەن 200 ءتىلشى تىركەلگەن.

4- سانات - وتاندىق ب ا ق وكىلدەرى. داۋىس بەرۋ كۇنىندە ءار ب ا ق-تان 1 وكىلدەن، تەلەارنالاردان 3 وكىلدەن قاتىسا الادى. ول ءۇشىن ب ا ق وكىلىنىڭ قىزمەتتىك كۋالىگى مەن رەكتسيالىق تاپسىرماسى بولۋى قاجەت.

«اتالعان 4 ساناتتىڭ وكىلدەرى داۋىس بەرۋ ۋچاسكەسىندە اشىلعان ساتتەن باستاپ، داۋىس بەرۋ ناتيجەلەرى انىقتالعانعا دەيىن قاتىسۋعا قۇقىلى. ولاردىڭ قۇقىقتارى مەن مىندەتتەرى زاڭنامامەن بەلگىلەنگەن. داۋىس بەرۋگە ارنالعان ءۇي-جايدا سايلاۋ كوميسسيا بەلگىلەگەن ەرەجەلەردى قاتاڭ ساقتاۋعا مىندەتتى. داۋىس بەرۋگە ارنالعان ءۇي-جايدا بوگدە ادامنىڭ بولۋىنا تىيىم سالىنادى»، - دەدى ول.