ەردوعان تۇركيا وپپوزيتسياسىنىڭ جەتەكشىسىن سوتقا بەردى

استانا. KAZINFORM - تۇركيا پرەزيدەنتى رەجەپ تايىپ ەردوعان وپپوزيتسيالىق حالىقتىق-رەسپۋبليكالىق پارتيانىڭ (ح ر پ) جەتەكشىسى وزگۇر وزەلدى قورلادى دەپ ايىپتاپ، ونى سوتقا بەردى. ول مورالدىق وتەماقى رەتىندە 500 مىڭ ليرا (شامامەن 12,5 مىڭ ا ق ش دوللارى) تالاپ ەتىپ وتىر، دەپ ت ا س س.

بۇل تۋرالى تۇركيا باسشىسىنىڭ ادۆوكاتى حيۋسەين ايدىن حابارلادى.

- 5-شىلدە كۇنى حالىقتىق-رەسپۋبليكالىق پارتيا (ح ر پ) ءتوراعاسى وزگۇر وزەل تاراپىنان پرەزيدەنتىمىزگە باعىتتالعان نەگىزسىز ايىپتاۋلارعا، قورلاۋ سيپاتىنداعى مالىمدەمەلەر مەن قوقان-لوققىلارعا بايلانىستى انكارانىڭ ءبىرىنشى ينستانتسياداعى ازاماتتىق سوتىنا 500 مىڭ ليرا كولەمىندە ءمورالدىق شىعىندى وتەۋ تۋرالى تالاپ ارىز بەرىلدى. سونىمەن قاتار، وزەلدىڭ پرەزيدەنتتى قورلاۋ جانە وعان قوقان-لوققى كورسەتۋ ارەكەتتەرى بويىنشا تۇركيا قىلمىستىق كودەكسىنىڭ 310/2-بابىنا سايكەس انكارانىڭ باس پروكۋراتۋراسىنا قىلمىستىق شاعىم جولداندى، - دەپ جازدى ادۆوكات الەۋمەتتىك جەلىدەگى X پاراقشاسىندا.

5-شىلدە كۇنى حرپ اتقارۋ كوميتەتىنىڭ وتىرىسىنان كەيىنگى باسپا ءسوز كونفەرەنسياسىندا وزەل سول كۇنى انتاليا، ادانا، ادىيامان جانە ماناۆگات قالالارىنىڭ اكىمدەرى سىبايلاس جەمقورلىق ىستەرى بويىنشا تۇتقىندالۋىنا بايلانىستى ەردوعاندى اۆتوريتاريزمگە ايىپتادى. ول سونىمەن بىرگە قاراشا ايىندا كەزەكتەن تىس پرەزيدەنتتىك سايلاۋ وتكىزۋدى تالاپ ەتىپ، بيلىك سول سايلاۋدا جەڭىلىس تاباتىنىن مالىمدەدى.

ەردوعان بۇعان دەيىن دە وزگۇر وزەلگە قارسى قورلاۋ ءۇشىن بىرنەشە رەت سوتقا جۇگىنگەن. ماسەلەن، 6-ساۋىردە وتكەن پارتيانىڭ كەزەكتەن تىس سەزىندە وزەل تۇركيا پرەزيدەنتىن «حۋنتانىڭ باسشىسى» دەپ اتاعاننان كەيىن ەردوعان تاعى دا 500 مىڭ ليرا كولەمىندە ءمورالدىق وتەماقى تالاپ ەتىپ، سوتقا ارىزدانعان بولاتىن.

ايتا كەتەيىك، 2-شىلدە كۇنى ىستانبۇلداعى ساراچحانە الاڭىندا قالا ەكس-اكىمى ەكرەم يماموعلۋعا قولداۋ كورسەتۋ ماقساتىندا اۋقىمدى ميتينگ ءوتتى.

بۇعان دەيىن تۇركيانىڭ ۇلى ۇلتتىق ماجىلىسىندە پرەزيدەنت رەجەپ تايىپ ەردوعاننىڭ اسكەري سالاداعى وكىلەتتىكتەرىن كەڭەيتۋ تۋرالى زاڭ جوباسى قارالىپ جاتقانى حابارلانعان ەدى.

ايتا كەتەلىك تۇركيادا ءۇش قالانىڭ مەرى ۇستالعان ەدى.

اۆتور

نازىم بولەسوۆا