ەردوعان قىرعىزستانعا ساپارمەن بارادى
بىشكەك. قازاقپارات-5-قاراشادا تۇركيا پرەزيدەنتى رەجەپ تايپ ەردوعان قىرعىزستانعا مەملەكەتتىك ساپارمەن بارادى، دەپ حابارلايدى Kazinform مەنشىكتى ءتىلشىسى.
قىرعىز رەسپۋبليكاسى پرەزيدەنتى اكىمشىلىگىنىڭ سىرتقى ساياسات ءبولىمىنىڭ مەڭگەرۋشىسى مۇراتبەك ازىمباكيەۆتىڭ ايتۋىنشا، الداعى ساپار اياسىندا قىرعىزستان مەن تۇركيا باسشىلارىنىڭ شاعىن قۇرامدا كەزدەسەدى، سونداي-اق ەكى مەملەكەت باسشىلارىنىڭ توراعالىعىمەن ستراتەگيالىق ىنتىماقتاستىق جونىندەگى جوعارعى كەڭەستىڭ التىنشى وتىرىسى وتەدى.
«ساپار قورىتىندىسى بويىنشا ەكى ەل اراسىنداعى ستراتەگيالىق ىنتىماقتاستىقتى كەڭەيتۋگە جانە مەملەكەتارالىق قاتىناستاردى ودان ءارى نىعايتۋعا باعىتتالعان ءبىرقاتار ەكىجاقتى قۇجاتتارعا قول قويۋ جوسپارلانىپ وتىر. سونداي- اق 6-قاراشادا تۇركيا رەسپۋبليكاسىنىڭ پرەزيدەنتى رەجەپ تايپ ەردوعان تۇركى مەملەكەتتەرى ۇيىمىنىڭ سامميتىنە قاتىسادى»، - دەپ اتاپ ءوتتى شەنەۋنىك.
بۇعان دەيىن مەملەكەت باسشىسى قاسىم-جومارت توقايەۆ پرەزيدەنت ەممانيۋەل ماكروننىڭ شاقىرۋىمەن 4-5-قاراشا كۇندەرى فرانسيا رەسپۋبليكاسىنا مەملەكەتتىك ساپارمەن باراتىنىن جازعان بولاتىنبىز.