ەردوعان 21-ناۋرىزدى رەسمي تۇردە كوكتەم مەن باۋىرلاستىق مەرەكەسى دەپ جاريالاۋدى ۇسىندى
استانا. KAZINFORM - ناۋرىز مەيرامىنا ارنالعان ءىس-شارادا ءسوز سويلەگەن تۇركيا پرەزيدەنتى رەجەپ تايىپ ەردوعان 21-ناۋرىزدى «كوكتەم مەن باۋىرلاستىق مەرەكەسى» ەتىپ جاريالاۋدى ۇسىنىپ، بۇل باستامانى پارلامەنتكە ەنگىزۋ باستاماسىن كوتەردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
اتالعان مالىمدەمە ناۋرىزدى مەرەكەلەۋ اياسىندا جاسالدى. ەردوعاننىڭ سوزىنشە، بۇل كوكتەمنىڭ، تۇركى الەمىنىڭ بىرلىگى مەن باۋىرلاستىعىنىڭ سيمۆولى بولماق.
تۇركيادا ناۋرىزعا دەگەن كوزقاراس بۇرىننان وتە كۇردەلى جانە قاراما-قايشىلىققا تولى. ەل تۇرعىندارىنىڭ كوپشىلىگى كوكتەمنىڭ بۇل مەرەكەسى تۋرالى كوپ بىلە بەرمەيدى. ناۋرىز ماڭىزدى وقيعا سانالاتىن قازاقستان، وزبەكستان مەن ازەربايجانعا قاراعاندا، تۇركيالىقتار بۇل كۇندى مويىندامايدى جانە بۇل ماسەلەدە كوپتەگەن قيىندىقتار بار.
بۇل كۇن كۇرد بىرلىگى مەن ساياسي كۇرەستىڭ سيمۆولى ىسپەتتەس. 1980 -جىلعى توڭكەرىستەن كەيىن بيلىك وكىلدەرى ناۋرىزدى سەپاراتيزمنىڭ سيمۆولى رەتىندە قابىلداپ، وعان تىيىم سالۋعا تىرىستى. سودان بەرى مەرەكە تەك كوكتەمگى جاڭارۋ كۇنى عانا ەمەس، نارازىلىق شاراسى رەتىندە دە قابىلداندى. ءوز كەزەگىندە ول مەملەكەتتىڭ ناۋرىزعا اسا ساقتىقپەن قاراۋىنا سەبەپ بولدى.
كەيىنگى كەزدە تۇركياداعى ساياسي كليمات وزگەرە باستادى. «كۇردىستاننىڭ جۇمىسشى پارتياسىنىڭ» كوشباسشىسى ادبۋللا ودجالاننىڭ قارۋلى كۇرەستى توقتاتىپ، كۇردتەر تۇراتىن اۋدانداردا بەيبىتشىلىككە ۇمتىلۋعا شاقىرۋى ناۋرىزعا دەگەن كوزقارستى وزگەرتۋگە نەگىز بولدى.
تۇركيالىق جۋرناليست مۋرات يەتكيننىڭ پىكىرىنشە، ناۋرىزدى رەسمي مەرەكە دەپ مويىنداۋ ەلدەگى بىرلىكتى نىعايتۋداعى ماڭىزدى قادام بولار ەدى.
ول سونداي-اق بۇل كۇن كۇردتەر تۇراتىن وڭىرلەردە عانا ەمەس، ورتالىق ازيا مەن يراندا، اۋعانستاندا دا اتالىپ وتەتىنىن جانە ول مادەنيەت پەن تاريحتى جالعايتىن شارا ەكەنىن اتاپ ءوتتى.
يەتكيننىڭ پىكىرىنشە، ناۋرىزعا كۇرد سەپاراتيزمىنىڭ نىشانى رەتىندە قاراۋ قاتە جانە ساياسي تۇرعىدان نەگىزسىز. تۇپتەپ كەلگەندە ناۋرىز تۇرىك جانە پارسىلاردى قوسا العاندا كوپتەگەن حالىقتار اراسىندا مىڭداعان جىلداردان بەرى تويلانىپ كەلە جاتقان مەرەكە.
بۇل - ساياسي كۇرەستىڭ ەمەس، تابيعاتتىڭ تۇرلەنۋى مەن جاڭارۋىنىڭ، ىنتىماقتىڭ مەرەكەسى.
جۋرناليست سونىمەن قاتار ناۋرىزدىڭ تۇركيانىڭ رەسمي كۇنتىزبەسىنە ەنۋى ەلدەگى ءتۇرلى ەتنيكالىق جانە مادەني توپتاردىڭ تاتۋ- ءتاتتى قارىم-قاتىناسىن قالىپتاستىرۋداعى ماڭىزدى قادام بولاتىنىن جەتكىزدى.
وسىعان دەيىن ىستانبۇل گۋبەرناتورلىعىنىڭ اكىمشىلىگى ەكرەم يماموگلۋ ۇستالعاننان كەيىن نارازىلىق اكتسيالارىنا ەنگىزىلگەن ءتورت كۇندىك تىيىمنىڭ سولشىل كۇردتەردىڭ «تەڭدىك پەن دەموكراتيا» پارتياسى ۇيىمداستىراتىن ناۋرىزعا ارنالعان شەرۋگە اسەر ەتپەيتىنىن جاريالاعان بولاتىن.
كەشە ءوزىنىڭ سويلەگەن سوزىندە ەردوعان بۇل مەيرامدى مادەنيەتپەن قاتار تۇرىك مەملەكەتتەرى اراسىنداعى بايلانىستاردى نىعايتاتىن ماڭىزدى ەلەمەنت رەتىندە دە اتاپ ءوتتى.
ول ناۋرىزدىڭ بارلىق تۇرىك مەملەكەتتەرى ءۇشىن بىرلىك كۇنىنە اينالىپ، ءتۇرلى سالالار بويىنشا ىنتىماقتاستىقتى نىعايتۋعا سەپتىگىن تيگىزەتىنىن اتاپ ءوتتى.
- مەن 21-ناۋرىزدى كوكتەم مەن باۋىرلاستىق مەرەكەسى رەتىندە جاريالاۋ تۋرالى ۇسىنىستى پارلامەنتكە ەنگىزۋگە دايىنمىن، - دەپ مالىمدەدى ول.
تۇركيا پرەزيدەنتى بۇل كۇندى تۇرىك مەملەكەتتەرى ۇيىمىنا مۇشە ەلدەردىڭ بارلىعى ءۇشىن ورتاق ەتۋدى ۇسىنىپ، ونى بىرلەسىپ اتاپ ءوتۋدىڭ ءوزارا قارىم-قاتىناستاردى ودان سايىن تەرەڭدەتۋ ءۇشىن ماڭىزدى ەكەنىن اتادى.
- مەنىڭشە، ناۋرىز مەرەكەسىن تۇرىك مەملەكەتتەرى ۇيىمى اياسىندا بىرلەسىپ اتاپ وتەتىن ۋاقىت جەتتى. مامىر ايىندا، ماجارستاندا وتەتىن سامميت بارىسىندا ءبىز بۇل مەرەكەنى تۇرىك الەمى ءۇشىن ورتاق كۇن رەتىندە اتاپ ءوتۋدى ۇسىنامىز، - دەدى ەردوعان.
ونىڭ سوزىنشە، تۇرىك ينتەگراتسياسى مەن باۋىرلاس ەلدەردىڭ ءبىر-بىرىنە جاقىن بولا ءتۇسۋىنىڭ ارقاسىندا ناۋرىز تۇركيادا تانىمال بولا باستادى.
وسىعان دەيىن كۇردىستان جۇمىسشى پارتياسى تۇركيا ۇكىمەتىمەن بىتىمگە كەلەتىنىن جاريالاعانى تۋرالى جازدىق.