ەرعالي شامەي پاراليمپيا ويىندارىنىڭ كۇمىس جۇلدەسىن ەنشىلەدى
پاريج. KAZINFORM - قازاقستاندىق پارا دزيۋدوشى ەرعالي شامەي پاريجدە ءوتىپ جاتقان پاراليمپيادا ويىندارىنىڭ فينالىندا سىنعا ءتۇستى.
پارا دزيۋدودان J1 ساناتىندا 73 كەلى سالماقتا ونەر كورسەتكەن ەرعالي شامەي فينالدىق بەلدەسۋدە رۋمىنيالىق بالۋان فلورين-الەكساندر بولوگاعا جول بەرىپ، پاريج پاراليمپياداسىنىڭ كۇمىس جۇلدەگەرى اتاندى.
«پاريجدەگى ءدۇبىرلى دودادا وتانداسىمىز ەرعالي شامەي تاتاميدە تاباندىلىق تانىتىپ، پاراليمپيا ويىندارىنىڭ كۇمىس جۇلدەگەرى اتاندى. بىلەكتى بالۋانىمىزدىڭ تالانتى مەن جەڭىسكە دەگەن جىگەرىنە بۇكىل الەم كۋا بولدى. ونىڭ وسى جولدا كورسەتكەن قاجىرلى ەڭبەگى كەز كەلگەن جانعا ۇلگى بولا الادى. ەرعاليعا الداعى جارىستاردا جەڭىس تىلەيمىن!»، - دەدى تۋريزم جانە سپورت ءمينيسترى ەربول مىرزابوسىنوۆ.
ەسكە سالا كەتەيىك، بۇدان بۇرىن اقمارال ناۋاتبەكتىڭ جازعى پاراليمپيادا ويىندارىنىڭ جەڭىمپازى اتانعانىن جازعان بولاتىنبىز.
سونداي-اق قازاقستاندىق ءجۇزۋ شەبەرى نۇرداۋلەت جۇماعالي پاراليمپيادانىڭ كۇمىس جۇلدەگەرى بولدى.