ەربول تاجىبايەۆ ا ق ش-تاعى حالىقارالىق تالانتتار وليمپياداسىندا باس جۇلدە الدى

استانا. KAZINFORM - روزا باعلانوۆا اتىنداعى «قازاق كونسەرت» مەملەكەتتىك اكادەميالىق كونسەرتتىك ۇيىمىنىڭ ءارتىسى ەربول تاجىبايەۆ ا ق ش-تىڭ لوس-اندجەلەس قالاسىندا وتكەن «WorldStars» حالىقارالىق تالانتتار وليمپياداسىنا قاتىسىپ، باق سىناعان 3 نوميناتسياسىندا باس جۇلدەگە يە بولدى.

مادەنيەت جانە اقپارات مينيسترلىگىنىڭ باسپا ءسوز قىزمەتىنىڭ مالىمەتىنشە، بەدەلدى بايقاۋ الەمنىڭ تۇكپىر-تۇكپىرىنەن جينالعان جەتەكشى ۆوكاليستەرگە، تالانتتى ورىنداۋشىلارعا وزدەرىنىڭ مۋزىكالىق جەتىستىكتەرىن كورسەتىپ، ونەرىن الەمگە پاش ەتۋگە مۇمكىندىك سىيلايدى.

ەربول تاجىبايەۆ تاتتىمبەت اتىنداعى قاراعاندى ونەر كوللەدجىندە «كلاسسيكالىق ۆوكال» ماماندىعى بويىنشا، اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە ءبىلىم العان.

فوتو: مادەنيەت جانە اقپارات مينيسترلىگى

ەلىمىزدەگى «Qazaqstan داۋىسى»، «Topjargan»، «بەس جۇلدىز» جانە ت. ب. كوپتەگەن بەدەلدى رەسپۋبليكالىق بايقاۋلار مەن جوبالاردا كەرەمەت ونەر كورسەتىپ، كورەرمەن قوشەمەتىنە بولەنگەن ەرەكشە دارىن يەسى.