بۇل تۋرالى قوردىڭ باسقارۋشى ديرەكتورى ياروسلاۆ ماندرون استانادا وتكەن «تەڭگەرىمدى ەكونوميكالىق دامۋعا باستار جول» حالىقارالىق كونفەرەنسياسىنىڭ كۋلۋارىندا مالىمدەدى.
ياروسلاۆ ماندروننىڭ ايتۋىنشا، قازىر قور قازاقستانمەن ىنتىماقتاستىق ستراتەگياسىن تالقىلاپ جاتىر. قۇجاتتى جەلتوقساندا ە ت د ق- عا مۇشە ەلدەردىڭ قارجى مينيسترلەرىنىڭ كەزدەسۋىندە بەكىتۋ جوسپارلانىپ وتىر.
- ءبىز قازاقستان مۇددەسىنە قىزمەت ەتەتىن جوبالارعا شامامەن 500 ميلليون دوللار بولگىمىز كەلەدى. الايدا بۇل قارجى ەلىمىزدە ەمەس، قىرعىزستان، تاجىكستان جانە ارمەنيادا جۇزەگە اسىرىلاتىن جوبالارعا جۇمسالماق، - دەدى ول.
ونىڭ تۇسىندىرۋىنشە، قازاقستان مەن رەسەي - قوردىڭ دونور ەلدەرى. سوندىقتان ە ت د ق قازاقستاننىڭ وڭىردەگى مۇددەلەرىن باسقا مەملەكەتتەردەگى جوبالار ارقىلى قولداۋ مۇمكىندىگىن قاراستىرىپ وتىر.
قور ەنەرگەتيكا، سۋ رەسۋرستارى مەن كولىك سالالارىنا باسىمدىق بەرمەك. ەنەرگەتيكادا سۋ ەلەكتر ستانسيالارىن دامىتۋعا، ال سۋ سالاسىندا اۋىل شارۋاشىلىعىنىڭ سۋعا دەگەن سۇرانىسىن وتەۋگە جانە حالىقتى تازا اۋىزسۋمەن قامتاماسىز ەتۋگە ەرەكشە كوڭىل بولىنبەك.
ماڭىزدى جوبالاردىڭ ءبىرى - قىرعىزستانداعى قامبار-اتا گەس-1 قۇرىلىسى. جوبا ستانسيانىڭ وزىمەن قاتار وعان قاجەتتى ينفراقۇرىلىمدى دامىتۋدى دا قامتيدى.
قور قازاقستان، قىرعىزستان، وزبەكستان جانە دۇنيەجۇزىلىك بانك سياقتى حالىقارالىق سەرىكتەستەرمەن بىرگە جوبانى قارجىلاندىرۋ تەتىگىن ازىرلەۋدى كوزدەپ وتىر.
ياروسلاۆ ماندرون قوردىڭ مۇشە ەلدەرگە قولداۋ كورسەتۋ ءتاسىلىن وزگەرتۋ جوسپارىنا دا توقتالدى. ونىڭ ايتۋىنشا، الداعى بىرنەشە جىلدا كۇردەلى داعدارىس قاۋپى بولماسا، قور ىقتيمال تاۋەكەلدەردى ەرتە انىقتاپ، ولاردىڭ الدىن الۋعا كوبىرەك كوڭىل بولمەك.
- ءبىزدىڭ مىندەتىمىز - الداعى جىلدارى تۋىنداۋى مۇمكىن قولايسىز فاكتورلاردى الدىن الا بولجاۋعا كومەكتەسۋ جانە ەلدەرمەن بىرلەسىپ ءتيىستى تەتىكتەردى ازىرلەۋ. بۇل ەڭ الدىمەن ەكونوميكانىڭ قول جەتكىزگەن ءوسۋ قارقىنىن ساقتاپ، كورسەتكىشتەردىڭ كۇرت قۇبىلۋىنا جول بەرمەۋ ءۇشىن قاجەت، - دەدى ول.
باسقارۋشى ديرەكتوردىڭ سوزىنشە، بۇل جۇمىستا تەحنيكالىق قولداۋ ماڭىزدى ءرول اتقارادى. اتاپ ايتقاندا، مامانداردى تارتۋ، زەرتتەۋلەر جۇرگىزۋ جانە مۇشە ەلدەرمەن بىرلەسىپ قاجەتتى مودەلدەر ازىرلەۋ كوزدەلگەن.
بۇعان دەيىن ەۋرازيالىق ەكونوميكالىق كوميسسيا مەن ەۋرازيالىق تۇراقتاندىرۋ جانە دامۋ قورى اراسىندا ىنتىماقتاستىق تۋرالى مەموراندۋمعا قول قويىلعانىن حابارلاعان ەدىك.