گەرمانيانىڭ اۆتوكولىك ونەركاسىبى باسەكەدەگى ورنىن جوعالتىپ جاتىر

EY مالىمەتىنشە، 2026 -جىلدىڭ ءبىرىنشى جارتىجىلدىعىندا نەمىس اۆتوكونسەرندەرىنىڭ تابىسى %2,9- عا تومەندەپ، شامامەن 284 ميلليارد ەۋرونى قۇراعان.

ال الەمدەگى 19 ءىرى اۆتوكولىك كومپانياسىنىڭ جيىنتىق تابىسى %3,6- عا ءوسىپ، شامامەن 1,048 تريلليون ەۋروعا جەتكەن. جاپونيالىق وندىرۋشىلەردىڭ تابىسى %7,9- عا، ەۋروپانىڭ باسقا اۆتوكونسەرندەرىنىڭ كىرىسى %9,8- عا، امەريكالىق كومپانيالاردىڭ كورسەتكىشى %4,5- عا، ال قىتايلىق وندىرۋشىلەردىڭ تابىسى %0,9- عا ارتقان.

وسىلايشا، نەگىزگى اۆتوكولىك ءوندىرۋشى ەلدەر اراسىندا تابىس ءوسىمى بويىنشا نەمىس كومپانيالارى سوڭعى ورىنعا تۇسكەن.

گەرمانيانىڭ ءۇش ءىرى اۆتوكونسەرنىنىڭ جارتىجىلدىقتاعى جيىنتىق پايداسى 13 ميلليارد ەۋرودان استى. بۇل — 2017 -جىلدان بەرگى ەكىنشى ەڭ تومەن كورسەتكىش. اۆتوونەركاسىپتىڭ بۇدان دا تومەن ناتيجە كورسەتكەن كەزەڭى تەك 2020 -جىلى، COVID-19 پاندەمياسى كەزىندە بولعان.

EY ساراپشىسى كونستانتين گاللدىڭ ايتۋىنشا، سالاعا ەڭبەك اقىسىنىڭ، ەنەرگيا تاسىمالداۋشىلاردىڭ جانە بيۋروكراتيالىق شىعىنداردىڭ جوعارىلىعى قىسىم جاساپ وتىر. سونىڭ سالدارىنان گەرمانيادا اۆتوكولىك ءوندىرۋ بارعان سايىن ءتيىمسىز بولا تۇسكەن.

— سوندىقتان نەمىس كونسەرندەرى ءوندىرىستى تيىمدىلىگى جوعارى ايماقتارعا كوشىرۋ ارقىلى تىعىرىقتان شىعۋدىڭ جولىن ىزدەپ جاتىر، — دەدى ساراپشى.

قىتاي نارىعى نەمىس كومپانيالارى ءۇشىن اسا ماڭىزدى. سەبەبى قىسقا مەرزىمدە باسقا وڭىرلەردەگى كىرىستىڭ ازايۋىن قىتاي نارىعىنسىز وتەۋ وتە قيىن بولادى. وتكەن جىلى Volkswagen .Mercedes جانە BMW كومپانيالارىنىڭ الەمدىك ساتىلىمىنداعى قىتايدىڭ ۇلەسى %28,9- دان %23,5- عا دەيىن تومەندەگەن.