ۆاكتسينا تاپشىلىعى ەلدە تۇماۋعا قارسى جاپپاي ەكپە سالۋ ناۋقانى ءجۇرىپ جاتقان كەزەڭدە بايقالعان.
قاۋىمداستىق باسشىسىنىڭ ايتۋىنشا، كەيبىر دارىگەرلىك كابينەتتەرگە ۆاكتسينالار بەلگىلەنگەن مەرزىمنەن ەداۋىر كەش جەتكىزىلگەن نەمەسە تاپسىرىس بەرىلگەن مولشەردەن از كەلگەن. اسىرەسە 60 جاستان اسقان ادامدارعا ارنالعان پرەپاراتتارعا قاتىستى قيىندىقتار تۋىنداپ وتىر.
وسىعان بايلانىستى دارىگەرلەر قولدا بار ۆاكتسينالاردى ىزدەپ، ءدارىحانالارعا حابارلاسۋعا ءماجبۇر. ال كەيبىر ناۋقاستار جوسپارلانعان ەكپە ۋاقىتىن كەيىنگە شەگەرگەن.
- بۇل ۆاكتسيناتسيا ناۋقانىن جۇرگىزۋگە ايتارلىقتاي كەدەرگى كەلتىرىپ وتىر. ونىڭ ۇستىنە حالىقتىڭ ەكپەمەن قامتىلۋ دەڭگەيى ونسىز دا تىم تومەن، - دەدى نيكولا بۋلينگەر- گەپفارت Augsburger Allgemeine باسىلىمىنا بەرگەن سۇحباتىندا.
گەرمانيانىڭ پاۋل ەرليح ينستيتۋتى بيىل ۆاكتسينا پارتيالارىن تەكسەرۋ جانە اينالىمعا شىعارۋ جۇمىستارى ادەتتەگىدەن كەش باستالعانىن راستادى.
بۇعان وندىرۋشىلەر تاراپىنان جەتكىزىلىمنىڭ كەشىگۋى سەبەپ بولعان. اتاپ ايتقاندا، ۆاكتسينا قۇرامىنداعى تۇماۋ ۆيرۋسىنىڭ ءۇش شتامىن دا جاڭارتۋ قاجەتتىلىگى ءوندىرىس پروتسەسىن باياۋلاتقان.
سوعان قاراماستان ينستيتۋت وكىلدەرى ەل كولەمىندە جاپپاي ۆاكتسينا تاپشىلىعى جوق ەكەنىن اتاپ ءوتتى. قاراشا ايىنىڭ باسىنا دەيىن گەرمانيادا 20,2 ملن دوزا ۆاكتسينا اينالىمعا شىعارىلعان.
مامانداردىڭ پىكىرىنشە، سۇرانىس جوعارى بولعان جاعدايدا جەكەلەگەن وڭىرلەردە ۋاقىتشا تاپشىلىق تۋىنداۋى مۇمكىن.
گەرمانيانىڭ فەدەرالدىق فارماتسيەۆتەر بىرلەستىگى دە جاعدايدى اسا كۇردەلى دەپ باعالامايدى. ۇيىم مالىمەتىنشە، ۆاكتسينالار جالپى العاندا جەتكىلىكتى كولەمدە جەتكىزىلىپ جاتىر. دەگەنمەن كەيبىر ءدارىحانالاردا پرەپارات ۋاقىتشا بولماۋى مۇمكىن.
ال جالپى پراكتيكا دارىگەرلەرى ماسەلەنىڭ ءبىر سەبەبى ۆاكتسينالارعا الدىن الا تاپسىرىس بەرۋ جۇيەسىندە ەكەنىن ايتادى.
مەديتسينالىق مەكەمەلەر ەكپە ماۋسىمى باستالعانعا دەيىن شامامەن توعىز اي بۇرىن تاپسىرىس بەرۋگە مىندەتتى. الايدا سول كەزدە ناقتى سۇرانىستى بولجاۋ قيىن.
ەگەر ۆاكتسينا شامادان تىس كوپ تاپسىرىس بەرىلسە، قارجىلىق تاۋەكەل تۋىندايدى. ال تاپسىرىس كولەمى جەتكىلىكسىز بولسا، قوسىمشا پرەپاراتتى جەدەل الۋ قيىنعا سوعادى.
روبەرت كوح ينستيتۋتىنىڭ ۇسىنىمدارىنا سايكەس، تۇماۋعا قارسى ەكپەنى قازان ايىنان جەلتوقساننىڭ ورتاسىنا دەيىن سالدىرعان ءجون. بۇل ماۋسىمدىق اۋرۋشاڭدىق شارىقتاۋ شەگىنە جەتكەنگە دەيىن يممۋنيتەت قالىپتاستىرۋعا مۇمكىندىك بەرەدى.
ايتا كەتەيىك، بۇعان دەيىن قازاقستاندا ماۋسىمدىق تۇماۋعا قارسى ۆاكتسيناتسيالاۋ ناۋقانى باستالىپ، حالىقتى تەگىن ەگۋ ءۇشىن 2,1 ميلليون دوزا ۆاكتسينا ساتىپ الىنعانى حابارلانعان ەدى.