اۋىل شارۋاشىلىعى ۆيتسە-ءمينيسترى تالاسبەك قانافين گەرمانيانىڭ اۋىل شارۋاشىلىعى فەدەرالدىق مينيسترلىگىنىڭ پارلامەنتتىك مەملەكەتتىك حاتشىسى مارتينا ەنگلحاردت-كوپفپەن كەزدەستى. كەزدەسۋدە ەكى ەلدىڭ ساۋدا بايلانىستارىن كەڭەيتۋ، بىرلەسكەن جوبالاردى جۇزەگە اسىرۋ جانە اگروونەركاسىپ سالاسىنداعى ارىپتەستىكتى تەرەڭدەتۋ ماسەلەلەرى ءسوز بولدى.
تالاسبەك قانافين قازاقستاننىڭ گەرمانيامەن اگرارلىق سالاداعى بايلانىستى دامىتۋعا مۇددەلى ەكەنىن اتاپ ءوتتى.
گەرمانيا اۋىل شارۋاشىلىعىن جاڭعىرتۋ، زاماناۋي تەحنولوگيالاردى ەنگىزۋ، وسىمدىك سۇرىپتارى مەن مال تۇقىمدارىن اسىلداندىرۋ، سونداي-اق ءوندىرىستىڭ تۇراقتىلىعىن قامتاماسىز ەتۋ باعىتتارىندا مول تاجىريبە جيناقتاعان.
- ەكى ەل اراسىنداعى اۋىل شارۋاشىلىعى ونىمدەرىنىڭ ساۋداسى دا ارتىپ كەلەدى. 2025-جىلى اگروونەركاسىپ ونىمدەرىنىڭ ءوزارا ساۋدا كولەمى # عا ءوستى. وسى كەزەڭدە قازاقستاننىڭ اۋىل شارۋاشىلىعى ونىمدەرىنىڭ ەكسپورتى 8 عا ارتتى. ال 2026-جىلدىڭ قاڭتار-تامىز ايلارىندا ەكى ەل اراسىنداعى تاۋار اينالىمى وتكەن جىلدىڭ سايكەس كەزەڭىمەن سالىستىرعاندا 11,6 پايىزعا كوبەيدى، - دەلىنگەن ا ش م حابارلاماسىندا.
مارتينا ەنگلحاردت-كوپف ەكى ەل اراسىنداعى بايلانىستى ودان ءارى نىعايتۋدىڭ، سالا ماماندارىنىڭ تاجىريبە الماسۋىنىڭ جانە اگرارلىق باعىتتارداعى بىرلەسكەن جۇمىستى جانداندىرۋدىڭ ماڭىزىن اتاپ ءوتتى.
ءسۇتتى مال شارۋاشىلىعى - ىنتىماقتاستىقتىڭ ماڭىزدى باعىتتارىنىڭ ءبىرى. KFM جوباسى اياسىندا 400 دەن استام مامان ارنايى وقۋدان ءوتىپ، كاسىبي بىلىكتىلىگىن ارتتىردى. سونىمەن قاتار ءسۇت وندىرۋشىلەرگە كەڭەس بەرىپ، وقىتۋ جۇمىستارىن جۇرگىزەتىن ورتالىق اشىلدى.
ورتالىق ازيا ەلدەرىندە تۇراقتى ەگىنشىلىك تاسىلدەرىن دامىتۋعا ارنالعان وڭىرلىك ورتالىق قۇرۋ جۇمىستارى دا جالعاسىپ جاتىر. جاڭا ورتالىقتىڭ ماقساتى - ايماق ەلدەرىنىڭ تاجىريبە الماسۋىنا جاعداي جاساۋ، وزىق ادىستەردى كەڭىنەن تاراتۋ جانە جەرگىلىكتى تابيعي-كليماتتىق جاعدايلارعا بەيىمدەلگەن زاماناۋي تەحنولوگيالاردى ەنگىزۋگە قولداۋ كورسەتۋ.
- قازاقستان مەن گەرمانيا اراسىنداعى وندىرىستىك بايلانىستىڭ تاعى ءبىر ناقتى ناتيجەسى - CLAAS كومپانياسىنىڭ اۋىل شارۋاشىلىعى تەحنيكاسىن قازاقستاندا شىعارۋى. جوبا باستالعالى بەرى جالپى قۇنى شامامەن 270 ميلليارد تەڭگە بولاتىن 2,1 مىڭعا جۋىق تەحنيكا ءوندىرىلدى. بۇل وتاندىق ماشينا جاساۋ سالاسىنىڭ دامۋىنا سەرپىن بەرىپ، شارۋالاردىڭ زاماناۋي تەحنيكاعا قول جەتكىزۋىنە مۇمكىندىك تۋعىزادى.
الداعى ۋاقىتتا اسىل تۇقىمدى مال ءوسىرۋ، تۇقىم شارۋاشىلىعى، سەلەكسيا جانە ورگانيكالىق اۋىل شارۋاشىلىعى سالالارىنداعى بايلانىستى كەڭەيتۋ كوزدەلىپ وتىر. جىل سوڭىنا دەيىن گەرمانيادان جالپى قۇنى شامامەن 6 ميلليارد تەڭگە بولاتىن 5 مىڭ باس گولشتين-فريز تۇقىمدى ءىرى قارا اكەلۋ جوسپارلانعان، - دەلىنگەن حابارلامادا.
تۇقىم شارۋاشىلىعىندا دا گەرماندىق تەحنولوگيالارعا سۇرانىس ارتىپ كەلەدى. قازاقستاندىق شارۋاشىلىقتار مەن عىلىمي مەكەمەلەر گەرمانيانىڭ PETKUS كومپانياسىمەن بىرلەسىپ، تۇقىمدىق ماتەريالدى دايىنداۋعا ارنالعان 15 تەحنيكا ساتىپ الدى. ساتىپ الىنعان جابدىقتاردىڭ جالپى قۇنى - 2,9 ميلليارد تەڭگە. جاڭا تەحنيكا تۇقىمدى وڭدەۋ مەن دايىنداۋ ساپاسىن جاقسارتۋعا، سونداي-اق وسى باعىتتاعى جۇمىستاردىڭ تيىمدىلىگىن ارتتىرۋعا مۇمكىندىك بەرەدى.
كەزدەسۋ سوڭىندا تاراپتار بۇعان دەيىن قول جەتكىزىلگەن ۋاعدالاستىقتاردى ىسكە اسىرۋدى جالعاستىرۋعا، سالا ماماندارىنىڭ تاجىريبە الماسۋىن جانداندىرۋعا جانە اگروونەركاسىپتىڭ باسىم باعىتتارىندا جاڭا بىرلەسكەن جوبالاردى قولعا الۋعا كەلىستى.
ەكى ەل الداعى ۋاقىتتا اۋىل شارۋاشىلىعىنا وزىق تەحنولوگيالاردى ەنگىزۋگە، ءوندىرىس تيىمدىلىگىن ارتتىرۋعا جانە ۇزاق مەرزىمدى ىنتىماقتاستىقتى نىعايتۋعا كۇش سالماق.
ايتا كەتەلىك اقمولا وبلىسىنا گەرمانيادان 165 باس گولشتين سيىرى اكەلىندى.