جاقىندا براندەنبۋرگ فەدەرالدىق جەرىندەگى جوعارعى شپريەۆالد- لاۋزيتس وكرۋگىنە قاراستى راددۋش ەلدى مەكەنىندەگى فەرمەر جۇما كۇنى تاڭەرتەڭ پوليتسياعا ونىڭ جايىلىمنان 48 ءىرى قارا مالىنىڭ تولىقتاي ۇرلانعانىن حابارلاعان. كەلتىرىلگەن شىعىن شامامەن 75 مىڭ ەۋروعا باعالانىپ وتىر.
وسىدان نەبارى 14 كۇن بۇرىن براندەنبۋرگتەگى ەلبا- ەلستەر وكرۋگىنىڭ حەرتسبەرگ ماڭىندا بەلگىسىز ادامدار 74 ءىرى قارانى ۇرلاپ كەتكەن. قىلمىس ورنىندا جۇك كولىگىنىڭ ىزدەرى تابىلعان.
ال ءساۋىر ايىندا ءدال وسى ەلبا- ەلستەر وكرۋگىنىڭ فالكەنبەرگ قالاسىندا اسىل تۇقىمدى فەرماداعى 69 بۇزاۋ جوعالىپ كەتكەن. تەرگەۋشىلەردىڭ مالىمەتىنشە، قىلمىسكەرلەر فەرما اۋماعىنا شالعاي جول ارقىلى كىرىپ، شامامەن 40 توننالىق جۇك كولىگىمەن قوراعا تىكەلەي جاقىنداعان. ولار ءۇش پەن التى اي ارالىعىنداعى ۇرعاشى بۇزاۋلاردى تاڭداپ، 69 مالدى كولىككە تيەپ اكەتكەن.
ۇيىمداسقان قىلمىستىق توپتار كۇدىككە ءىلىنىپ وتىر
گەرمانيادا قوي، ءىرى قارا، قاز، ءتىپتى ارا ۇيالارىن ۇرلاۋ جاعدايلارى جيىلەپ كەلەدى. اسىرەسە ەلدىڭ شىعىس ايماقتارىندا ءىرى كولەمدەگى مال ۇرلىعىن ۇيىمداسقان توپتار جاسايدى دەگەن كۇدىك كۇشەيگەن.
تەرگەۋشىلەردىڭ ايتۋىنشا، بۇل — كاسىبي تۇردە جوسپارلانعان قىلمىستار. قىلمىسكەرلەر تۇنگى ۋاقىتتا ارەكەت ەتەدى. مالدىڭ شىعۋ تەگىن جاسىرۋ ءۇشىن قۇلاقتاعى سايكەستەندىرۋ بەلگىلەرى الىنىپ تاستالادى نەمەسە جالعان تاڭبالارمەن اۋىستىرىلادى.
كەي جاعدايلاردا مالدى تيەۋ كەزىندە ولاردى تىنىشتاندىرۋ ءۇشىن ءدارى- دارمەك (سەداتيۆتەر) قولدانىلعانى دا انىقتالعان.
«فەرماداعى قىلمىس» فەرمەرلەرگە اۋىر سالماق ءتۇسىرىپ وتىر
اۋىلدىق جەرلەردەگى قىلمىس دەڭگەيىنىڭ ءوسۋى ءقازىر «فەرما قىلمىسى» دەگەن ۇعىممەن بىرىكتىرىلىپ جاتىر. مال ۇرلىعىنان بولەك، فەرمەرلەر قىمبات اۋىل شارۋاشىلىعى تەحنيكاسى مەن تراكتورلارداعى GPS جۇيەلەرىنىڭ ۇرلانۋىنان دا زارداپ شەگىپ كەلەدى.
كەي فەدەرالدىق جەرلەردە (مىسالى، تومەنگى ساكسونيا مەن مەكلەنبۋرگ- الدىڭعى پومەرانيادا) قىلمىس سانى ءوسىپ وتىرسا، شلەزۆيگ- گولشتەيندە سوڭعى ۋاقىتتا ازداپ تومەندەۋ بايقالعانىمەن، دەڭگەيى ءالى دە جوعارى.
بۇعان دەيىن NDR تەلەارناسى «فەرماداعى قىلمىس ورنى: اۋىلدىق جەردەگى ۇرلىق» اتتى رەپورتاجىندا گەرمانيانىڭ سولتۇستىگىندەگى فەرمەرلەردىڭ جارتىسىنان استامى ۇرلىقتان زارداپ شەگەتىنىن حابارلاعان. مالدان بولەك، ونىمدەر مەن اۋىل شارۋاشىلىعى تەحنيكالارى دا ۇرلانادى.
فەرمەرلەر ساقتىق شارالارىن كۇشەيتپەك
كوپتەگەن شارۋاشىلىق قوسىمشا قاۋىپسىزدىك شارالارىن ەنگىزىپ جاتىر. ولاردىڭ قاتارىندا بەينەباقىلاۋ ورناتۋ، قورالاردى جارىقتاندىرۋدى كۇشەيتۋ جانە فەرمەرلەر اراسىندا WhatsApp سياقتى جەلىلەر ارقىلى جەدەل اقپارات الماسۋ بار. بۇل كۇدىكتى جاعدايلاردى تەز حابارلاپ، ۇرلىقتىڭ الدىن الۋعا كومەكتەسەدى.
گەرمانيادا اۋىل شارۋاشىلىعى جانۋارلارى ورتالىقتاندىرىلعان تۇردە تىركەلەتىندىكتەن، پوليتسيا ۇرلانعان مالدىڭ كوپ بولىگى شىعىس ەۋروپا ەلدەرىنە نەمەسە ەۋرووداقتان تىس مەملەكەتتەرگە شىعارىلۋى مۇمكىن دەپ كۇدىكتەنەدى. زاڭ بويىنشا جانۋارلاردى تاسىمالداۋ شەكارادان وتكەندە تەكسەرىلۋى ءتيىس، ءبىراق كەي جاعدايدا ولار رۇقساتسىز جابىق جۇك كولىكتەرىمەن جاسىرىن تۇردە تاسىمالدانۋى مۇمكىن.
بۇدان بۇرىن الماتى وبلىسىندا 43 مال ۇرلاعان بارىمتاشىلار ۇستالعانىن جازدىق.