اۆياتسيا ۇزاق جىلدار بويى فريدريح مەرتستىڭ باستى اۋەستىكتەرىنىڭ ءبىرى بولعان. ول ۇشقىش كۋالىگىن 2009 -جىلى العان.
— ۇشاقتى باسقارۋ بالا كەزىمدەگى ارمانىم ەدى. بۇلتتاردىڭ اراسىنان كوتەرىلىپ، كوگىلدىر اسپاندى كورۋ جانە قوزعالتقىشتاردىڭ ءبىرقالىپتى جۇمىس ىستەگەنىن ەستۋ ماعان ەرەكشە ءلاززات سىيلايدى، - دەگەن ەدى ول 2022 -جىلى Bunte جۋرنالىنا بەرگەن سۇحباتىندا.
گەرمانيا كانسلەرى قىزمەتىنە كىرىسپەس بۇرىن، 2024 -جىلى مەرتس روستوك قالاسىنىڭ ماڭىنداعى لااگە اۋە بازاسىنا بارىپ، Eurofighter جويعىش ۇشاعىمەن ەكىنشى ۇشقىش رەتىندە اۋەگە كوتەرىلگەن. ءبىر ساعاتقا سوزىلعان ۇشۋ كەزىندە ۇشاق دىبىس جىلدامدىعىنان اسىپ، شامامەن 1,3 ماح جىلدامدىقپەن قوزعالعان. قونعاننان كەيىن ساياساتكەر بۇل تاجىريبەنى «تاماشا وقيعا» دەپ باعالاعان.
الايدا ۇكىمەت باسشىسى قىزمەتىنە كىرىسكەننەن كەيىن ونىڭ اۆياتسياعا ۋاقىت بولۋگە مۇمكىندىگى ازايعان. 14- قاراشادا فريدريح مەرتس شلەزۆيگ- گولشتەيندە وتكەن حريستيان-دەموكراتيالىق وداق (حدس) پارتياسىنىڭ سەزىنە چارتەرلىك ۇشاقپەن بارعان. بۇقارالىق اقپارات قۇرالدارىندا تاراعان حابارلارعا قاراماستان، ۇشاقتى كانسلەردىڭ ءوزى ەمەس، اۋە تاسىمالداۋشى كومپانيانىڭ كاسىبي ۇشقىشى باسقارعان.
Bild مالىمەتىنشە، ۇشاقتى ءوز بەتىنشە باسقارۋ قۇقىعىن ساقتاۋ ءۇشىن ۇشقىشتار ۇشۋ تاجىريبەسىن تۇراقتى تۇردە راستاپ وتىرۋى كەرەك. ول ءۇشىن جىل سايىن كەمىندە 12 ساعات ۇشۋ نەمەسە 12 رەت اۋەگە كوتەرىلىپ، قونۋ قاجەت. سونداي-اق نۇسقاۋشىمەن بىرگە ءبىر ساعاتتىق وقۋ-جاتتىعۋ رەيسىن ورىنداۋعا بولادى.
تىعىز جۇمىس كەستەسىنە بايلانىستى مەرتس بۇل تالاپتاردى ورىنداي الماعان. سونىڭ سالدارىنان ول ۇشاقتى ءوز بەتىنشە باسقارۋ قۇقىعىنان ۋاقىتشا ايىرىلعان.
سونىمەن قاتار كانسلەردىڭ نەگىزگى ۇشقىش كۋالىگى ءالى دە جارامدى. بولاشاقتا اۆياتسياعا قايتا ۋاقىت بولۋگە مۇمكىندىك تۋسا، ول قاجەتتى تالاپتاردى ورىنداپ، ۇشاقتى جەكە باسقارۋ قۇقىعىن قالپىنا كەلتىرە الادى.
ەسكە سالا كەتەيىك، توقايەۆ كانسلەر فريدريح مەرتستى ەلىمىزگە مەملەكەتتىك ساپارمەن كەلۋگە شاقىرعان بولاتىن.