سونداي-اق قىتايلىق اۆتوكولىكتەردىڭ اسكەري نىساندار اۋماعىنا كىرۋىنە شەكتەۋ قويىلدى، دەپ حابارلايدى Massaget.kz.
بۋندەسۆەر گارنيزوندار مەن پوليگونداردا قىتايدا وندىرىلگەن شاعىن ۇشقىشسىز ۇشۋ اپپاراتتارىنىڭ بارلىق ءتۇرىن پايدالانۋدى توقتاتتى. بۇعان دەيىن ساتىپ الىنعان، ونىڭ ىشىندە DJI ماركالى درونداردى دا قولدانىستان شىعارۋ تاپسىرىلعان.
گەرمانيا قورعانىس مينيسترلىگى وكىلىنىڭ ايتۋىنشا، قىتايلىق قۇرىلعىلار نەمىس نەمەسە ەۋروپالىق بالامالارمەن الماستىرىلادى.
قىتايلىق كولىكتەر اسكەري نىساندارعا كىرگىزىلمەيدى
گەرمانيا ارمياسى BYD جانە Geely سەكىلدى قىتايلىق ماركالاردىڭ اۆتوكولىكتەرىن اسكەري نىساندارعا كىرگىزۋگە دە تىيىم سالدى. اسكەري قىزمەتشىلەر مۇنداي كولىكتەردى قاۋىپسىزدىك ايماعىنان تىس قالدىرىپ، قىزمەت ورنىنا جاياۋ بارۋعا ءتيىس.
شەكتەۋلەر قىتايدا شىعارىلعان تەحنيكاداعى كامەرالار مەن داتچيكتەر قۇپيا اقپارات جيناپ، ونى قىتايدىڭ قاۋىپسىزدىك ورگاندارىنا جىبەرۋى مۇمكىن دەگەن قاۋىپكە بايلانىستى ەنگىزىلگەن.
Der Spiegel مالىمەتىنشە، دروندار قىتايدىڭ ارنايى قىزمەتتەرىنە كازارمالار مەن پوليگونداردىڭ سۋرەتتەرىن، اسكەري جاتتىعۋلاردىڭ بارىسى جانە قارۋ-جاراق جۇيەلەرى تۋرالى اقپاراتتى بەرۋى ىقتيمال.
قىتايلىق تەحنيكاعا قاتىستى قاۋىپ نەدەن تۋىندادى؟
ەۋروپا ەلدەرى مۇنداي شارالاردى ۇلى بريتانيا اقپارات قۇرالدارىنىڭ حابارلامالارىنان كەيىن قابىلداي باستاعان. وندا قىتايدا جاسالعان بولشەكتەرى بار ۇلى بريتانيا اسكەري-تەڭىز كۇشتەرىنىڭ بارلاۋ دروندارى قىتايعا جاسىرىن تۇردە اقپارات جىبەرگەنى ايتىلعان.
بۇعان دەيىن ساراپشىلار ينتەرنەتكە قوسىلعان قىتايلىق ەلەكتروموبيلدەردىڭ كامەرا، ميكروفون جانە داتچيكتەرى ارقىلى تىڭشىلىق جاساۋ قۇرالىنا اينالۋى مۇمكىن ەكەنىن ەسكەرتكەن. گەرمانيا بيلىگى قازىر وسىنى زەرتتەپ جاتىر.
قازاقستاندا دا زاماناۋي، ونىڭ ىشىندە قىتايدا شىعارىلعان كولىكتەردىڭ ازاماتتاردىڭ دەربەس مالىمەتتەرىن جيناۋ ىقتيمالدىعى كوتەرىلگەن. ءماجىلىس دەپۋتاتى ءابۋتالىپ ءمۋتالى قىتايلىق اۆتوكولىكتەرگە قويىلاتىن تالاپتاردى كۇشەيتۋدى ۇسىنعان بولاتىن.