كەزدەسۋگە پرەمەر- مينيستر سەباستەن لەكورنيۋ، ىشكى ىستەر ءمينيسترى لوران نۋنەس جانە ۇلتتىق ءبىلىم ءمينيسترى ەدۋار جەففرە قاتىستى.
ەليسەي سارايىنىڭ حابارلاۋىنشا، مۇنداي كەڭەستەر نارازىلىق قوزعالىسى باستالعان قىركۇيەك ايىنىڭ ورتاسىنان بەرى تۇراقتى تۇردە وتكىزىلىپ كەلەدى.
كەڭەس نارازىلىق قوزعالىسىنىڭ «ءۇشىنشى كەزەڭىمەن» تۇسپا-تۇس كەلدى. سەيسەنبى كۇنى ليتسەي وقۋشىلارى، مۇعالىمدەر مەن كاسىپوداق وكىلدەرى ونداعان قالادا كوشەگە شىقتى.
ىشكى ىستەر مينيسترلىگىنىڭ مالىمەتىنشە، ەل بويىنشا نارازىلىق شارالارىنا 256 مىڭ ادام قاتىسقان. ونىڭ شامامەن 56 مىڭى پاريجدە بولعان.
ال نارازىلىقتى ۇيىمداستىرۋشىلاردىڭ، سونىڭ ىشىندە ليتسەي وقۋشىلارى وداعى USL مەن Union étudiante ۇيىمىنىڭ مالىمەتىنشە، شەرۋگە 450 مىڭ ادام قاتىسقان. ونىڭ شامامەن 100 مىڭى ەل استاناسىندا بولعان.
ءبىلىم مينيسترلىگىنىڭ مالىمەتىنشە، شامامەن 3700 ليتسەيدىڭ 891-ىندە ساباقتار تولىق نەمەسە ءىشىنارا توقتاتىلعان. ليتسەي وقۋشىلارىنىڭ كاسىپوداعى بۇل جاعداي شامامەن 1800 وقۋ ورنىنا اسەر ەتكەنىن مالىمدەدى. پاريج، ليون، ستراسبۋرگ، رەنن جانە مارسەل قالالارىندا وقۋ ورىندارىنىڭ كىرەبەرىستەرى بوگەلىپ، بارريكادالار قويىلعان جانە پوليتسيامەن قاقتىعىستار بولعان. قۇقىق قورعاۋ ورگاندارى كوزدەن جاس اعىزاتىن گاز قولداندى.
نارازىلىق قوزعالىسى 17-21 قىركۇيەكتە پاريج ماڭىنداعى كرەتەي قالاسىنداعى سەنت- ەكزيۋپەري ليتسەيىندە باستالىپ، كوپ ۇزاماي يل- دە- فرانس وڭىرىنەن تىس جەرلەرگە دە تارادى. 15-18 جاستاعى وقۋشىلار مۇعالىم جەتىسپەۋشىلىگىن شەشۋدى، سىنىپتارداعى وقۋشى سانىن ازايتۋدى، عيماراتتاردى جوندەۋدى، وقۋ كۇنىن قىسقارتۋدى جانە جوعارى وقۋ ورىندارىنا قابىلداۋ جۇيەسى — Parcoursup-تى قايتا قاراۋدى تالاپ ەتىپ وتىر.
بيلىكتىڭ مالىمەتىنشە، نارازىلىق باستالعالى بەرى مىڭداعان ادام ۇستالعان، ولاردىڭ باسىم بولىگى - كامەلەتكە تولماعاندار. جۇزدەگەن پوليتسيا قىزمەتكەرى مەن وقۋشى جاراقات العان. دۇيسەنبى كۇنى فرانتسيانىڭ سولتۇستىگىندە 15 جاستاعى جاس ءوسپىرىم پوليتسيا قولدانعان ارنايى گراناتانى كوتەرگەن كەزدە قولىنان ايىرىلدى.
ۇلتتىق اسسامبلەيادا لەكورنيۋ «ساياسي تاپسىرىسپەن قۋعىن-سۇرگىن جۇرگىزىلىپ جاتىر» دەگەن ايىپتى جوققا شىعارىپ، مۇنداي اڭگىمەلەردى «وتىرىك» دەپ اتادى. پرەمەر-مينيستر اپتانىڭ سوڭىندا ليتسەيلەردە ساباقتاردى توقتاتىپ، «ىشكى دەموكراتيا ۋاقىتىن» وتكىزۋدى جوسپارلاپ وتىرعانىن مالىمدەدى. بۇعان دەيىن ءبىلىم مينيسترلىگى ليتسەي وقۋشىلارى شاعىمدارىن جاسىرىن تۇردە جولداي الاتىن ونلاين پلاتفورما ىسكە قوسقان بولاتىن. كاسىپوداق جەتەكشىلەرى بۇل شارالاردى جەتكىلىكسىز دەپ باعالادى.
نارازىلىقتار قاتاڭ بيۋدجەت جوباسىن ازىرلەۋ جانە 2027-جىلعى پرەزيدەنت سايلاۋىنا بىرنەشە اي قالعاندا ءوتىپ جاتىر. ماكروننىڭ ەكىنشى پرەزيدەنتتىك مەرزىمى اياقتالىپ كەلەدى، سوندىقتان ول سايلاۋعا قايتا تۇسە المايدى.
بۇعان دەيىن Kazinform فرانتسياداعى ليتسەي وقۋشىلارىنىڭ نارازىلىعى جۇزدەگەن مەكتەپتىڭ جۇمىسىنا كەدەرگى كەلتىرىپ، كورشى بەلگياعا دا تاراعانىن حابارلاعان. سونداي-اق نارازىلىق كەزىندە كەمىندە 190 وقۋشى جاراقات العانى تۋرالى جازعان بولاتىن.