دۇيسەنبىدە فرانسيادا 400 دەن استام مەكتەپ جابىق بولادى. ۇكىمەت وكىلدەرى جوعارى سىنىپ وقۋشىلارىنىڭ جاپپاي نارازىلىعىنا بايلانىستى وقۋ ورىندارىندا ءتيىستى قاۋىپسىزدىك دەڭگەيىن قامتاماسىز ەتۋ مۇمكىن ەمەس ەكەنىن مالىمدەدى. بۇعان قوسا، وتكەن اپتادا تارتىپسىزدىكتەر سالدارىنان جيىرمادان استام مەكتەپ ورتەنىپ، تونالعان.
نارازىلىقتار باستالعان وتكەن دۇيسەنبىدەن بەرى ۇكىمەتتىڭ مالىمەتىنشە، 170 وقۋشى مەن ءبىلىم بەرۋ جۇيەسىنىڭ 78 قىزمەتكەرى جاراقات العان. 5 مىڭنان استام ادام ۇستالدى، ولاردىڭ باسىم بولىگى - كامەلەتكە تولماعاندار.
فرانسۋز ليتسەيلەرىنىڭ جوعارى سىنىپ وقۋشىلارى مەكتەپ ءبىلىم بەرۋ جۇيەسىندەگى ماسەلەلەرگە، ەڭ الدىمەن، قارجىلاندىرۋدىڭ قىسقارۋىنا نارازىلىق ءبىلدىرىپ جاتىر. ولاردىڭ ايتۋىنشا، بۇل ءمۇعالىم تاپشىلىعىنا، وقۋ كۇنىنىڭ ۇزارۋىنا، سىنىپتاردىڭ قاجەتتى قۇرال-جابدىقتارمەن جەتكىلىكتى قامتىلماۋىنا جانە وقۋ عيماراتتارىنىڭ سانيتارلىق جاعدايىنىڭ ناشارلاۋىنا الىپ كەلگەن.
نارازىلىقتار پاريج ماڭىنداعى ەلدى مەكەندەردە باستالىپ، سولشىل راديكالدى ساياسي كۇشتەردىڭ اشىق قولداۋىمەن بۇكىل ەلگە تەز تارادى. كەي جەرلەردە اكتسيالار تارتىپسىزدىككە ۇلاسىپ، پوليتسيا كۇش قولدانۋعا ءماجبۇر بولدى. ىشكى ىستەر مينيسترلىگى تارتىپسىزدىكتەرگە ەكسترەميستىك توپتار ارانداتۋشىلىق جاساعانىن ايتىپ وتىر.
سەيسەنبىگە جاڭا ءىرى نارازىلىق اكتسيالارى جوسپارلانعان. وعان مۇعالىمدەر كاسىپوداقتارى مەن ستۋدەنتتەر دە قاتىسادى دەپ كۇتىلۋدە. ولار ەندى وزدەرىنىڭ پىكىرىنشە، قۇقىق قورعاۋ ورگاندارىنىڭ شامادان تىس ارەكەتتەرىنە دە قارسىلىق بىلدىرمەك.
بۇدان بۇرىن وتكەن سەنبىگە قاراعان ءتۇنى فرانتسيانىڭ سولتۇستىك-شىعىسىنداعى مەتس قالاسىنىڭ سابلون اۋدانىندا ورنالاسقان فرانسۋا رابلە كوللەدجىندە ورت شىققانىن جازعانبىز.