ۇسىنىلىپ وتىرعان باستاماعا سايكەس، ينتەرنەت- پلاتفورمالار لاڭكەستىك ارەكەتتەرگە، كوتەرىلىسكە نەمەسە مەملەكەتكە، سونداي-اق حالىقتىڭ جەكەلەگەن توپتارىنا قارسى قارۋلى كۇرەسكە شاقىراتىن ماتەريالداردى ءبىر ساعات ىشىندە وشىرۋگە مىندەتتەلەدى. تالاپ ورىندالماعان جاعدايدا بيلىك الەۋمەتتىك جەلىلەردى بۇعاتتاۋعا نەمەسە ولاردى ىزدەۋ جۇيەلەرىنىڭ ناتيجەلەرىنەن الىپ تاستاۋعا قول جەتكىزە الادى.
تۇزەتۋ ينتەرنەتتەگى زاڭسىز كونتەنتتى انىقتاۋمەن اينالىساتىن Pharos مەملەكەتتىك پلاتفورماسىنىڭ وكىلەتتىگىن كەڭەيتۋدى دە قاراستىرادى. سونىمەن قاتار الەۋمەتتىك جەلىلەرگە كىسى ولتىرۋگە، زورلىق-زومبىلىققا، ۇرلىققا جانە مۇلىكتى جويۋعا شاقىراتىن جازبالاردى 24 ساعات ىشىندە ءوشىرۋ مىندەتىن جۇكتەۋ ۇسىنىلعان. بۇل تالاپ قوعامدىق ءتارتىپتىڭ ەلەۋلى بۇزىلۋىنا اكەپ سوعۋى مۇمكىن ماتەريالدارعا قاتىستى قولدانىلادى.
باستاما 17 -قازانداعى نارازىلىق اكسيالارى كەزىندە بولعان جاپپاي تارتىپسىزدىكتەردەن كەيىن ازىرلەنگەن. دۇيسەنبى كۇنى فرانسيا پرەزيدەنتى ەممانيۋەل ماكرون مارسەل قالاسىنا ساپارى بارىسىندا الەۋمەتتىك جەلىلەر شابۋىلدار مەن توناۋ وقيعالارى بولعان جەرلەردە ادامداردى جيناۋ جانە ولاردىڭ ارەكەتتەرىن ۇيلەستىرۋ ءۇشىن پايدالانىلعانىن مالىمدەدى.
بۇعان دەيىن فرانسيا پرەزيدەنتى ەممانيۋەل ماكرون نارازىلىق اكسيالارى كەزىندە بولعان جاپپاي تارتىپسىزدىكتەردەن سوڭ مارسەل قالاسىنا باراتىنىن حابارلادىق.