گرانتقا تۇسە الماعان الماتىلىق تۇلەك مينيسترلىكتى سوتقا بەرگەن

استانا. قازاقپارات - زاڭگەر ءاجىعۇلوۆا ونداعان بالانىڭ سوتقا شاعىمدانۋعا نيەتتى ەكەنىن اتاپ ءوتتى. 

الماتىلىق تالاپكەر مەدينا مايسار عىلىم جانە جوعارى ءبىلىم مينيسترلىگىن سوتقا بەردى، دەپ حابارلادى turkystan.kz سايتى Stan.kz-كە سىلتەمە جاساپ.

مەدينا مايسار جوعارى بالل السا دا، گرانتقا تۇسپەي قالعانىنا، ال ودان تومەن العاندار گرانتقا ىلىگىپ كەتكەنىنە نارازى.

«كەشە ءبىرىنشى تالاپكەر عىلىم مينيسترلىگىنە اكىمشىلىك شاعىم ءتۇسىردى. وكىنىشتىسى، مينيسترلىك ءالى كۇنگە دەيىن ءوز قاتەسىن مويىنداماي، زاڭعا قايشى كەلىپ، توتەنشە كۆوتا ەنگىزۋگە قۇقىعى بارداي سىڭاي تانىتىپ وتىر»، - دەيدى زاڭگەر حاليدا ءاجىعۇلوۆا.

ونىڭ ايتۋىنشا، مەكتەپ ءبىتىرىپ، مەملەكەتتىك گرانتقا يە بولا الماي قالعان 200-دەن استام بالا كومەك سۇراپ كەلگەن.

ءىس ءالى سوتقا جەتكەن جوق. ءاجىعۇلوۆا ونداعان بالانىڭ سوتقا شاعىمدانۋعا نيەتتى ەكەنىن اتاپ ءوتتى. وسىعان دەيىن مەدينا مايسار پرەزيدەنتكە ۇندەۋ جولداپ، عىلىم جانە جوعارى ءبىلىم ءمينيسترى ساياسات نۇربەكتى قىزمەتىنەن بوساتۋدى سۇراعان ەدى.