پەرۋ ەلىنەن 3800 جىلدىق ەجەلگى قالا تابىلدى

استانا. KAZINFORM - ارحەولوگتار پەرۋدىڭ ەجەلگى پەنيكو قالاسىن تاپتى، ونىڭ جاسى شامامەن 3800 جىلعا تەڭ. قالا پەرۋدىڭ ۋاۋرا پروۆينتسياسىندا، ەل استاناسى ليمانىڭ سولتۇستىگىندە ورنالاسقان. بۇل جونىندە CNN حابارلادى.

عالىمداردىڭ بولجامىنشا، پەنيكو ب. ز. د. 1800-جىلدارى قۇرىلعان. قالا، شاماسى، جاعالاۋدا ورنالاسقان ەلدى مەكەندەردەن بيىك اند تاۋلارىنا جانە امازونكا وزەنىنىڭ بويىنداعى قونىستارعا باراتىن جول بويىنداعى ماڭىزدى توراپ بولعان. ارحەولوگتار تۇرعىن ۇيلەر مەن قوعامدىق عيماراتتاردى قوسا العاندا، 18 نىساندى انىقتاعان.

قوعامدىق عيماراتتاردىڭ بىرىنەن سازدان جاسالعان مۇسىندەر، ءدىني سالتاناتقا ارنالعان زاتتار جانە «پۋتۋتۋ» دەپ اتالاتىن قابىرشاقتاردان جاسالعان راسىمدىك ترۋبالار تابىلعان.

پەنيكو امەريكاداعى ەڭ كونە وركەنيەتتەردىڭ ءبىرى - كارال وركەنيەتىنىڭ قۇلدىراۋىنان كەيىن پايدا بولعان. پەرۋدەگى ءدال وسى اتتاس ەلدى مەكەن كارال- سۋپە اتاۋىمەن دە بەلگىلى جانە ب. ز. د. 2600-2000-جىلدار ارالىعىندا گۇلدەنگەن. پەنيكو قالاسى گەماتيت (جارقىراعان قىزىل ۇنتاق شىعاراتىن مينەرال) ساۋداسىنىڭ ارقاسىندا دامىعان دەپ ەسەپتەلەدى. بۇل مينەرال كەراميكا مەن ۇڭگىر سۋرەتتەرىندە، سونداي-اق دەنەگە سالتاناتتى بەلگىلەر سالۋ ءۇشىن پايدالانىلعان.

قازىر پەنيكو اۋماعى تۋريستەر ءۇشىن ءىشىنارا اشىق. قازبا جۇمىستارى بۇل جەردە 8 جىلعا سوزىلعان.

ايتا كەتەيىك، بۇعان دەيىن پەرۋدە 9 ميلليون جىل بۇرىن تىرشىلىك ەتكەن اكۋلانىڭ سۇيەكتەرى تابىلعانىن جازدىق.