ەگەر بالا شەتەلدە تۋعان بولسا، ونىڭ قۇجاتتارىن قالاي راسىمدەۋ كەرەك

استانا. KAZINFORM - قازاقستان ازاماتتارىنىڭ شەتەلدە تۋعان بالالارىن تىركەۋ قازاقستان رەسپۋبليكاسىنىڭ شەتەلدەگى مەكەمەلەرى ارقىلى نەمەسە ق ر اۋماعىنداعى تىركەۋ ورگاندارىندا - اتا-انالاردىڭ نەمەسە ولاردىڭ بىرەۋىنىڭ تاڭداۋى بويىنشا جۇرگىزىلۋى مۇمكىن، دەپ حابارلايدى Kazinform ءتىلشىسى.

بۇل تۋرالى قازاقستان رەسپۋبليكاسىنىڭ ادىلەت مينيسترلىگى ەسكە سالدى.

«نەكە (ەرلى-زايىپتىلىق) جانە وتباسى تۋرالى» كودەكسىنە سايكەس تۋۋدى تىركەۋ ءۇشىن كەلەسى قۇجاتتاردىڭ ءبىرىن ۇسىنۋ قاجەت:

● تۋۋ تۋرالى كۋالىكتىڭ ءتۇپنۇسقاسى،
● تۋۋ تۋرالى اكتىنىڭ كوشىرمەسى،
● تۋۋ تۋرالى مەديتسينالىق كۋالىكتىڭ ءتۇپنۇسقاسى.

ەگەر اتا-اناسىنىڭ نەكەسى شەتەلدە قيىلعان بولسا، نەكە تۋرالى كۋالىك تە قاجەت بولادى.

بالا تۋعاننان كەيىن ەكى ايدان كەشىگىپ ءوتىنىش بەرىلگەن جاعدايدا، كەشىكتىرۋ سەبەبىن كورسەتەتىن تۇسىندىرمە حات قوسا بەرىلۋى ءتيىس.

ءوتىنىشتى قاعاز تۇرىندە نەمەسە ەلەكتروندى تۇردە eGov.kz پورتالى ارقىلى بەرۋگە بولادى، بۇل اسىرەسە شەتەلدە جۇرگەندەر ءۇشىن ىڭعايلى. قىزمەت ونلاين-ءوتىنىش بەرگەن جاعدايدا 3 جۇمىس كۇنى ىشىندە جانە جەكە ءوتىنىش بەرگەندە 5 جۇمىس كۇنى ىشىندە كورسەتىلەدى.