قۇزىرەت شەگىنەن تىس - پرەمەر-مينيستر پارلامەنتتىك تەرگەۋ ينستيتۋتىن ەنگىزۋگە كەلىسپەيدى

 ق ر پرەمەر-ءمينيسترى ءاليحان سمايىلوۆ دەپۋتاتتاردىڭ پارلامەنتتىك تەرگەۋ ينستيتۋتىن ەنگىزۋ جونىندەگى ۇسىنىسىمەن كەلىسپەيدى، دەپ حابارلايدى Kazinform ءتىلشىسى. 

«دەپۋتاتتىق ساۋالدا قوعامدىق جانە پارلامەنتتىك باقىلاۋدى كۇشەيتۋ، وكىلدى، اتقارۋشى جانە سوت بيلىگى جۇيەسىندە تەجەمەلىك پەن تەپە-تەڭدىكتى قالىپتاستىرۋ جونىندەگى حالىقارالىق تاجىريبەنى ەنگىزۋ قاجەتتىگى تۋرالى اتاپ وتىلەدى. سونداي-اق «اق جول» ق د پ فراكسياسى، «AMANAT» پارتياسى، جالپىۇلتتىق سوتسيال-دەموكراتيالىق پارتيانىڭ دەپۋتاتتارى، سونداي-اق ءبىر مانداتتىق وكرۋگتەن سايلانعان دەپۋتاتتار توبى باستاما جاساعان «پارلامەنتتىك تەرگەۋ تۋرالى» زاڭ جوباسى قوسا بەرىلەدى. قاراستىرىلىپ وتىرعان ماسەلە بويىنشا الەمدىك تاجىريبەنى زەردەلەۋ پارلامەنتتىك تەرگەۋ ينستيتۋتىن ەنگىزۋدىڭ مەملەكەتتىك ورگاندار جۇيەسىمەن جانە مەملەكەتتىك باسقارۋ نىسانىمەن بايلانىستى ەكەنىن كورسەتتى»، - دەلىنگەن ۇكىمەت باسشىسىنىڭ جاۋابىندا.

ءاليحان سمايىلوۆ اتاپ وتكەندەي، نەگىزىنەن بۇل ينستيتۋتتى ەنگىزۋ پارلامەنتتىك رەسپۋبليكالارعا ءتان. ال كونستيتۋتسيانىڭ 2-بابىنا سايكەس، قازاقستان پرەزيدەنتتىك باسقارۋ نىسانىنداعى ءبىرتۇتاس مەملەكەت.

«پارلامەنت قىزمەتىنىڭ قۇقىقتىق نەگىزدەرىن تالداۋ پارلامەنتتىڭ تەكسەرۋدى جۇزەگە اسىرۋ جونىندەگى وكىلەتتىگى كونستيتۋتسيانىڭ 47-بابىندا - رەسپۋبليكا پرەزيدەنتىنە قاتىستى ونىڭ مەملەكەتكە وپاسىزدىق جاساعانى ءۇشىن بەكىتىلگەنىن كورسەتەدى. بۇدان باسقا، كونستيتۋتسيادا وزگە جاعدايلاردا پارلامەنتكە پارلامەنتتىك تەرگەۋدى جۇزەگە اسىرۋ قۇقىعىن بەرۋ كوزدەلمەيدى. سونىمەن قاتار كونستيتۋتسيالىق كەڭەس كونستيتۋتسيادا پارلامەنت وكىلەتتىگىنىڭ تۇپكىلىكتى ءتىزىمى بەلگىلەنگەنى جانە پارلامەنت وكىلەتتىگى كولەمىن ادەتتەگى نەمەسە كونستيتۋتسيالىق زاڭ قابىلداۋ جولىمەن وزگەرتۋ كوزدەلمەيتىنى تۋرالى رەسمي تۇسىندىرمە بەردى (1997 -جىلعى 15-قازانداعى № 17/2-قاۋلى)»، - دەپ جازىلعان ءاليحان سمايىلوۆتىڭ جاۋابىندا.

بۇل رەتتە پرەمەر-مينيستر پارلامەنت قىزمەتىندە پارلامەنتتىك باقىلاۋ مەحانيزمى جۇمىس ىستەپ تۇرعانىنا توقتالعان. ول قىزمەتكە سايلاۋ جانە بوساتۋ، تاعايىنداۋعا كەلىسىم بەرۋ، لاۋازىمدى تۇلعالاردى ولارعا ەشكىمنىڭ تيىسپەۋى جونىندەگى قۇقىعىنان ايىرۋدى، ۇكىمەتكە سەنىم تۋرالى ماسەلەنى شەشۋدى، پارلامەنتتىك تىڭداۋلار وتكىزۋدى، دەپۋتاتتىق ساۋال جولداۋدى قامتيدى.

«وسىلايشا، پارلامەنتتىك باقىلاۋ ينستيتۋتىنىڭ نەگىزىن كونستيتۋتسيادا، «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭدا، سونداي- اق پارلامەنت رەگلامەنتىندە جانە وزگە دە نورماتيۆتىك قۇقىقتىق اكتىلەردە كوزدەلگەن نورمالار كەشەنى قۇرايدى. جوعارىدا ايتىلعانداردىڭ نەگىزىندە باستاما جاسالىپ وتىرعان زاڭ جوباسىندا ۇسىنىلعان پارلامەنتتىك تەرگەۋدى جۇزەگە اسىرۋ جونىندەگى پارلامەنتتىڭ وكىلەتتىگى كونستيتۋتسيادا بەلگىلەنگەن زاڭ شىعارۋشى ورگاننىڭ قۇزىرەتى شەڭبەرىنىڭ شەگىنە جاتپايتىنىن اتاپ وتەمىز»، - دەلىنگەن پرەمەر-ءمينيستردىڭ دەپۋتات ساۋالىنا وراي جازعان جاۋابىندا.