قىزىنىڭ ۇرلانعانىنا 49 جىل: جاپونيالىق انا سولتۇستىك كورەياعا تالاپ قويدى

استانا. KAZINFORM - سولتۇستىك كورەيا 1977-جىلى 13 جاسىندا ۇرلاپ اكەتكەن جاپون قىزى مەگۋمي يەكوتانىڭ اناسى ارادا 49 جىل وتسە دە، قىزىن ەلگە قايتارۋ ماسەلەسىن شەشۋگە شاقىردى. قازىر 90 جاستاعى ساكيە يەكوتا قىزىنىڭ تاعدىرىنا ءالى دە الاڭدايتىنىن ايتتى. بۇل تۋرالى Kyodo News اگەنتتىگى جازدى.

Фото: Kyodo News

مەگۋمي يەكوتانىڭ اناسى بۇل مالىمدەمەنى سەنبى كۇنى بەينەبايلانىس ارقىلى قاتىسقان ءىس-شارادا جاسادى. جەكسەنبى، 15-قاراشادا، ونىڭ قىزىنىڭ جوعالعانىنا 49 جىل تولدى. مەگۋميدى 1977 -جىلعى 15-قاراشادا كەشكىسىن جاپونيانىڭ جاپون تەڭىزى جاعالاۋىنداعى نييگاتا پرەفەكتۋراسىندا مەكتەپتەن ۇيىنە قايتىپ بارا جاتقان جەرىنەن ۇرلاپ اكەتكەن.

ءىس-شاراعا قاتىسقان شامامەن 700 ادامنىڭ الدىندا مەگۋميدىڭ ءىنىسى تەتسۋيا ماسەلەنى شەشۋ ءۇشىن ەكى ەل باسشىلارى دەڭگەيىندە كەلىسسوز جۇرگىزۋدىڭ ماڭىزىن اتاپ ءوتتى.

- بۇل - جۇمىس دەڭگەيىندەگى ەمەس، جوعارى دەڭگەيدەگى كەزدەسۋلەر ارقىلى شەشىلەتىن ماسەلە، - دەدى ول.

جاپونيا پرەمەر-ءمينيسترى ساناە تاكايچي جەكسەنبى كۇنى X الەۋمەتتىك جەلىسىندەگى پاراقشاسىندا بارلىق ۇرلانعان ازاماتتىڭ وتانىنا دەرەۋ ورالۋىنا مۇمكىندىك جاساۋ ءوزىنىڭ «مىندەتى» ەكەنىن جازدى.

ول پرەمەر-مينيستر قىزمەتىندە بولعان كەزەڭدە بۇل ماسەلەنى شەشۋدە «بەتبۇرىس جاساۋعا» ۋادە بەرىپ، سولتۇستىك كورەيا باسشىسىمەن سامميت وتكىزۋدەن ءۇمىتتى ەكەنىن ءبىلدىردى.

جاپونيا ۇكىمەتى 1970- 1980 -جىلدارى سولتۇستىك كورەيا ۇرلاپ اكەتكەن 17 ازاماتتى رەسمي تۇردە مويىنداعان. ولاردىڭ بەسەۋى 2002 -جىلى ەلگە قايتارىلدى. سونىمەن قاتار توكيو سولتۇستىك كورەيانى باسقا دا كوپتەگەن ادامنىڭ جوعالۋىنا قاتىسى بار دەپ ايىپتايدى.

ەلگە قايتارىلعان بەس ازاماتتىڭ ءبىرى - 67 جاستاعى حيتومي سوگا. ول وزىمەن بىرگە ۇرلانعان اناسى يەسيدىڭ ورالۋىن ءالى كۇتىپ ءجۇر.

- ونىڭ ءار كۇنىن قالاي وتكىزىپ جاتقانىن ويلاسام، جانىمدى قويارعا جەر تاپپايمىن، - دەدى ول ءىس-شارادان كەيىن جۋرناليستەرگە.

سونداي-اق ول اناسىنىڭ ەلگە ورالۋىن تىلەپ، دۇعا ەتۋدى جالعاستىراتىنىن ايتتى.