قىزىلوردالىق ايەل ەمحانادان ميلليون تەڭگە ءوندىرىپ الدى

استانا. KAZINFORM - سوت قىزىلوردا تۇرعىنىنىڭ مورالدىق شىعىن ءۇشىن ەمحانادان وتەماقى ءوندىرۋ تۋرالى تالاپ ارىزىن قاناعاتتاندىردى.

قىزىلوردا قالاسىنىڭ تۇرعىنى 2016-جىلى ۇل بوسانعان. بالاعا بىردەن «جەدەل مي قان اينالىمى بۇزىلىسى، گەمورراگيالىق ءتۇرى. سۋپراتەنتوريالدى قان كەتۋ» دياگنوزى قويىلعان. ال قالالىق ەمحانادا ەسەپتە تۇرعانىمەن، جاۋاپتى قىزمەتكەرلەر بالاعا تولىق ديسپانسەرلىك باقىلاۋ جۇرگىزبەگەن.

«ناتيجەسىندە، مۇمكىندىگىنىڭ شەكتەلۋ دارەجەسىن قۇجاتتاۋ بويىنشا دارىگەرلىك-كونسۋلتاتسيالىق كوميسسياعا جولداۋدا ونىڭ بار-جوعى كورسەتىلمەگەن. سوندىقتان مۇگەدەكتىگى شەكتەۋلى توبى بالاعا 7 جاستان كەيىن عانا تاعايىندالعان، بۇل كەزەڭدە مەديتسينا قىزمەتكەرلەرى بالاعا ديسپانسەرلىك باقىلاۋ جۇرگىزبەگەن، ەمدىك-ساۋىقتىرۋ ءىس-شارالارىنا جولدامالار بەرىلمەگەن جانە ولار ءتيىستى دەڭگەيدە جۇرگىزىلمەگەن، ال نيەۆرولوگيالىق پاتولوگيا بويىنشا مامانداردىڭ باقىلاۋى تولىق كولەمدە جۇرگىزىلمەگەن»، - دەلىنگەن حابارلامادا.

اتالعان دەرەكتەردىڭ مەديتسينالىق جانە فارماتسيەۆتيكالىق باقىلاۋ كوميتەتىنىڭ وبلىستىق دەپارتامەنتىمەن جوسپاردان تىس تەكسەرۋ بارىسىندا انىقتالعانىنا بايلانىستى ۋچاسكەلىك دارىگەر تارتىپتىك جاۋاپكەرشىلىككە (سوگىس) تارتىلىپ، ال ەمحانا باسشىلىعىنا 2016-2023-جىلدارعا ارنالعان مۇگەدەكتىگى شەكتەۋلى بالالارعا جانە ولاردى كۇتۋشىلەرگە جاردەماقى تولەۋدى تىركەۋ بويىنشا زاڭبۇزۋشىلىقتاردى جويۋ تۋرالى ۇيعارىم شىعارىلعان.

«قاجەتتى ەمدەۋ شارالارىن جۇرگىزبەۋ جانە ءتيىستى دەڭگەيدە مەديتسينالىق كومەك كورسەتپەۋ بالا دەنساۋلىعىنىڭ ناشارلاۋىنا اكەلدى. بۇل تۋرالى ونىڭ اناسى قىزىلوردا قالالىق سوتىنا كەلتىرىلگەن مورالدىق شىعىندى ءوندىرىپ الۋ تۋرالى تالاپ قويۋدا اتاپ كورسەتكەن.

سونداي-اق، ول مۇگەدەكتىگى شەكتەۋلى توبىن تىركەۋگە جولدامانىڭ ۋاقتىلى بەرىلمەۋىنە بايلانىستى - بالا دۇنيەگە كەلگەن ساتتەن باستاپ ساناتورييلەردە ەمدەلۋ مۇمكىندىگىنەن شەتتەتىلگەنىن اتاپ وتكەن. سوت ىستەگى قۇجاتتاردى زەردەلەي كەلە، مەديتسينالىق مەكەمەنىڭ ءوز مىندەتتەرىن ورىنداماۋى جانە ءتيىستى مەديتسينالىق كومەك كورسەتپەۋ سالدارىنان انانىڭ بالاسىنا قيىندىقتار تۋىپ، بالانىڭ اناسى رەنىش، مورالدىق جانە فيزيكالىق ازاپ شەككەنىن اتاپ ءوتتى».

وسىعان بايلانىستى سوت تالاپ قويۋدى قاناعاتتاندىردى: ەمحانادان بالانىڭ اناسىنىڭ پايداسىنا مورالدىق شىعىن ءۇشىن 1 ميلليون تەڭگە ءوندىرىلدى.

سوت شەشىمى زاڭدى كۇشىنە ەنگەن جوق.