قىزىلوردادا سابانتوي مەرەكەسى ءوتتى
قىزىلوردا. KAZINFORM - قىزىلوردادا وبلىستىق تاتار ەتنومادەني بىرلەستىگى جيىرماسىنشى رەت سابانتويدى تويلادى. بۇل تۋرالى وبلىستىق قازاقستان حالقى اسسامبلەياسى حابارلادى.
وبلىستىق قوعامدىق دامۋ باسقارماسىنىڭ باسشىسى رۋسلان كايۋپوۆ بۇل ىنتىماق پەن بىرلىك مەيرامى ەكەنىن اتاپ ءوتتى.
- وسىنداي جارقىن مەرەكەگە بىرگە كۋا بولۋ، ءبىز ءۇشىن ۇلكەن قۋانىش. بارشاڭىزعا اماندىق، ەڭبەكتەرىڭىزگە تابىس، شاڭىراقتارىڭىزعا شاتتىق تىلەيمىن. سابانتوي قۇتتى بولسىن، - دەدى ول.
ەتنومادەني بىرلەستىك ءتوراعاسى گاليا گيزاتۋللينا سابانتوي ەڭبەك مەرەكەسى عانا ەمەس، ۇلتتىڭ رۋحاني بولمىسىن، باي مادەنيەتىن، تاتۋلىق پەن ءوزارا سىيلاستىقتى پاش ەتەتىن ەرەكشە كۇن ەكەنىن جەتكىزدى.
مەرەكەلىك دۋماندا ونەرپازدار تاتاردىڭ ۇلتتىق ءانى مەن ءبيىن كوپشىلىك نازارىنا ۇسىندى.
«سارمان» ۆوكال توبى، «جاسمين» بيشىلەر توبى، سونداي-اق تاتارستاننان ارنايى كەلگەن قوناقتار يلنۋر ەنيكەيەۆ پەن الينا احمەتشينا ءوز ونەرىمەن كورەرمەندەردى ءتانتى ەتتى. حالىق ويىندارى مەن سپورتتىق جارىستار ۇيىمداستىرىلدى.
ايتا كەتەيىك، قىزىلوردادا ەتنومادەني ۇيىمنىڭ ونكۇندىگى ءوتىپ جاتىر. ونكۇندىك اياسىندا بۇعان دەيىن العاش رەت «تاقياداعى جۇگىرىس» سايىسى ءوتتى. قاتىسۋشىلار تاتاردىڭ ۇلتتىق باس كيىمى - تاقيانى كيىپ، 500 مەتردەن 1000 شاقىرىمعا دەيىنگى ارالىققا جۇگىردى.