قىزىلوردا وبلىسىنداعى جانكەنت شاھارىنىڭ ىرگەتاسى بەسىنشى عاسىردا قالانعان با
قىزىلوردا. KAZINFORM - قىزىلوردا وبلىسىندا ورنالاسقان كونە جانكەنت شاھارىنىڭ ىرگەتاسىنىڭ قالانۋىنا بايلانىستى جاڭا دەرەكتەر پايدا بولدى.
زەرتتەۋشىلەر شاھاردىڭ پايدا بولۋ مەرزىمى بەسىنشى عاسىرعا دەيىن سوزىلۋى مۇمكىن ەكەنىن ايتادى.
قازىرگە دەيىن تاريحي نىساندى زەرتتەۋشى عالىمدار جانكەنتتىڭ قالىپتاسۋ كەزەڭى IX- XI عاسىرلارعا سايكەس كەلەتىنى جونىندە بولجام جاساپ جۇرگەن ەدى. بۇگىندە تاريحي نىساننان كوپتەگەن جان- جانۋاردىڭ سۇيەگى تابىلىپ، اتالعان تۇجىرىمعا ءبىرقاتار وزگەرىس ەنگىزۋگە تۋرا كەلىپ وتىر. ماسەلەن، جانكەنتتەن دالا مىسىعى اتانعان ءمالىننىڭ كەزدەسۋى ارحەلوگتاردىڭ تاريحي نىساننىڭ قالىپتاسۋىنا بايلانىستى وزگەشە بولجام جاساۋىنا الىپ كەلدى.
ا ق ش- تىڭ وكسفورد ۋنيۆەرسيتەتىنىڭ ارحەولوگ-پالەوزوولوگى ەشلي حارۋدى وسى باعىتتا تىڭ مالىمەتتەردى جيناقتاپ وتىر. ول قىزىلورداعا قورقىت اتا ۋنيۆەرسيتەتىنىڭ شاقىرتۋىمەن كەلدى.
«جەرگىلىكتى ارىپتەستەرىم قالا ورنىنان تۇيە، سيىر، جىلقى، قوي، ءتىپتى مىسىق پەن بالىقتىڭ دا سۇيەگىن تاپقان. سوندىقتان كەلەشەكتە وسى باعىتتا جان- جاقتى زەرتتەۋدى جوسپارلاپ وتىرمىز. جالپى، مىسىقتى قولعا ۇيرەتۋ يران نەمەسە ەگيپەتتەن باستالدى دەگەن دەرەكتەر ايتىلادى. ەندىگى كەزەكتە باسقاشا بولجام جاساۋعا نەگىز بار»، - دەيدى ول.
كونە قالا قازالى اۋدانىنا قاراستى وركەندەۋ اۋىلى اۋماعىندا ورنالاسقان. تاريحشىلاردىڭ ايتۋىنشا، جانكەنت وعىز ەلىنە جۇزدەگەن جىل استانا بولعان. جانكەنت ۇلى جىبەك جولىندا جاتقان ساۋدا-ساتتىقتىڭ ۇلكەن قالاسى رەتىندە تانىلعان.
كەيىنگى جىلداردا جانكەنت قالاسىنا ارحەولوگيالىق قازبا جۇمىستارىن جۇرگىزۋگە باسا نازار اۋدارىلىپ وتىر.