قىزىلوردا وبلىسىندا شەگىرتكەلەر جىلداعىدان ەكى اپتا ەرتە وياندى
قىزىلوردا. KAZINFORM - بۇگىن قىزىلوردا وبلىسىندا شەگىرتكەمەن كۇرەس جۇمىسى باستالدى.
ا ش م اگروونەركاسىپتىك كەشەندەگى مەملەكەتتىك ينسپەكسيا كوميتەتى قىزىلوردا وبلىستىق اۋماقتىق ينسپەكسياسىنىڭ مالىمەتىنشە، بيىل 60 مىڭ گەكتاردان استام جەردى حيميالىق جولمەن وڭدەۋ جوسپارلانىپ وتىر. زيانكەستىڭ، اسىرەسە، يتاليالىق پرۋس، ازيالىق، ساياق سياقتى تۇرلەرى قاپتاۋى مۇمكىن ەكەنى ەسكەرىلىپ، فيتوسانيتاريالىق ءىس-شارالار كۇشەيتىلدى. وعان 4 ارنايى جەر اگرەگاتى، 2 جەڭىل ۇشاق، 1 ۇشاق جانە 3 دروندى قاتىستىرۋ كوزدەلگەن.
- وتكەن جىلعا قاراعاندا بيىل قىزىلوردا وبلىسىندا شەگىرتكەلەر 12-13 كۇنگە ەرتە وياندى. يتاليالىق پرۋس دەرناسىلدەرىنىڭ � ى ارال اۋدانىنىڭ اۋماعىندا. ارعى جاعىنداعى ۇلىتاۋ، اقتوبە وبلىستارىنان ۇشىپ كەلگەن سياقتى. زيانكەس جۇمىرتقا سالعان اۋماق زەرتتەلدى. قازىر جەر بەتىنە دەرناسىلدەرى شىعىپ جاتىر، - دەدى ينسپەكسيا باسشىسى مۇحتار ورازبايەۆ.
زيانكەستىڭ تارالۋ اۋماعى ارال اۋدانى بويىنشا 21720 گەكتار، قازالىدا 1482 گەكتار، قارماقشى اۋدانىندا 100 گەكتار، جالاعاش اۋدانىندا 1300 گەكتار اۋماقتى قامتىپ وتىر. ينسپەكسيا باسشىسى اتاپ وتكەندەي، قىزىلوردا قالاسى مەن شيەلى، جاڭاقورعان اۋداندارىندا يتاليالىق پرۋستىڭ دەرناسىلدەرى جوق.
- ەسەسىنە ازيالىق شەگىرتكە دەرناسىلدەرى باسىم. مىسالى، ەڭ ۇلكەن بولىگى شيەلى اۋدانىندا - 8332 گەكتار. ودان بولەك، جاڭاقورعاندا 5 مىڭ، قارماقشىدا 6 مىڭ، قازالىدا 5490، ارالدا 4 مىڭ گەكتار جەرگە ازيالىق شەگىرتكە دەرناسىلدەرى شىعىپ جاتقانى انىقتالدى، - دەدى مۇحتار ورازبايەۆ.
سينوپتيكتەر بولجامىنشا الداعى ۋاقىتتا وڭىردە اۋا تەمپەراتۋراسى 44 گرادۋسقا دەيىن كوتەرىلەدى. شەگىرتكەنىڭ كوبەيۋىنە قولايلى ۋاقىت - وسى كەزەڭ. ال جەردى ۋلاۋ جۇمىسى تۋرالى بال ارالارىنا زيانى ءتيىپ كەتپەس ءۇشىن ومارتاشىلارعا الدىن الا حابارلانادى.
بۇعان دەيىن ءبىز قىزىلوردا وبلىسىندا كارانتيندىك زيانكەستەرگە قارسى حيميالىق وڭدەۋ جۇمىسى مامىر ايىنىڭ سوڭىنا قاراي باستالاتىنىن جازعانبىز.
اۆتور
نازەركە سانيازوۆا