ماقسات - قازاق ايەلىنىڭ ۇلتتىق بولمىسىن ايشىقتايتىن اق جاۋلىق پەن كيمەشەكتىڭ تاريحي، مادەني جانە تاربيەلىك ءمانىن ناسيحاتتاپ، ۇرپاقتار ساباقتاستىعىن نىعايتۋ.
تاعىلىمدى ءىس- شارا «سىر انا» مونۋمەنتى الاڭىنان باستالدى. العاشقى بولىمىندە كيمەشەكتىڭ سىرتىنان ورالاتىن كۇندىك باسكيىمىن 21 مەترلىك اق ماتامەن وراۋ ءداستۇرى كورسەتىلدى. تاقىرىپتىق كورىنىس ارقىلى ۇلتتىق باسكيىمنىڭ تاريحي- مادەني ءمانى مەن قازاق ايەلدەرىنىڭ ومىرىندەگى ورنى تانىستىرىلدى.
ال ماڭىزدى بولىگى اق جاۋلىقتى انالار مەن كيمەشەكتى اجەلەردىڭ سالتاناتتى شەرۋى بولدى. ۇلتتىق بىرەگەيلىك پەن ۇرپاقتار ساباقتاستىعىن ايشىقتاعان شەرۋ «سىر بولاشاعى» قۇزىرەتتىلىك ورتالىعىنان باستالىپ، اناعا تاعزىم ورتالىعىنا دەيىن جالعاستى. 200 گە جۋىق ايەل قاتىسقان مەرەكەلىك شەرۋگە اجەلەر انسامبلدەرى، ءبىلىم جانە مادەنيەت سالاسىنىڭ وكىلدەرى، «التىن القا» يەگەرلەرى مەن كوپبالالى انالار، قوعام بەلسەندىلەرى، ونەرپازدار قاتىستى.
فەستيۆال اناعا تاعزىم ورتالىعىنىڭ الاڭىندا قورىتىندىلاندى. وبلىستىق مادەنيەت، ارحيۆتەر جانە قۇجاتتاما باسقارماسى باسشىسىنىڭ ورىنباسارى عاليا بايسىنوۆا اقجاۋلىقتى انالاردىڭ قوعامداعى ورنىنا، اجە ونەگەسى مەن ۇلتتىق قۇندىلىقتاردى ۇرپاقتان ۇرپاققا جەتكىزۋدەگى ماڭىزىنا توقتالدى. سونداي-اق تاعىلىمدى شارانى ۇيىمداستىرۋعا ۇلەس قوسقان انالارعا باسقارما باسشىسىنىڭ العىس حاتى مەن ەستەلىك سىيلىقتار تابىستادى.
فەستيۆال اياسىندا كوپشىلىك نازارىنا كيمەشەكتىڭ ءتورت ۇلگىسى مەن جاۋلىقتىڭ ءۇش وبرازى ۇسىنىلعان تاقىرىپتىق قويىلىم كورسەتىلدى. ورتالىقتىڭ قولونەر شەبەرلەرى دايىنداعان كيمەشەكتەر كەنەپتى شاشاقپەن ارلەۋ، جاباعى جۇنمەن جيەكتەۋ، توقىما جىپپەن ورنەكتەۋ جانە ويۋ-ورنەكسىز تىگۋ ەرەكشەلىكتەرىمەن تانىستىرىلدى.
ال جاۋلىق ۇلگىلەرى ايەلدىڭ وتباسىلىق ءومىر كەزەڭدەرى مەن بالا سانىنا بايلانىستى كيىنۋ ۇلگىلەرىن كورسەتتى. وسى ارقىلى قازاق ايەلىنىڭ ۇلتتىق بولمىسى مەن ءداستۇرلى كيىم مادەنيەتىنىڭ سان قىرلى ەرەكشەلىكتەرى ايشىقتالدى.
فەستيۆال كونسەرتتىك باعدارلاماعا ۇلاستى.
ەسكە سالا كەتسەك، جۋىردا الماتىدا جازيرا جۇماشيەۆا مەن اسەل ءابىلقاي ەسىمدى ەكى سۋرەتشىنىڭ تۋىندىلارىن بىرىكتىرگەن «عاسىرلار جاڭعىرىعى: كيىز جانە كەنەپ» اتتى كورمە اشىلعانىن جازدىق.