قىزىلوردا وبلىسىندا ءۇش تەمىرجول ۆوكزالى جاڭارتىلدى

جاڭعىرتۋ جۇمىستارى ەلىمىزدەگى تەمىرجول ۆوكزالدارىن جاڭارتۋ باعدارلاماسى اياسىندا جۇرگىزىلدى.

ءۇش نىساندا دا قاسبەتتەر مەن شاتىرلار، ىشكى ءۇي-جايلار، ينجەنەرلىك جۇيەلەر، پەرروندار جانە ۆوكزال ماڭىنداعى اۋماقتار جاڭارتىلدى. ەنەرگيا ۇنەمدەيتىن تەرەزەلەر مەن اليۋميني ۆيتراجدار ورناتىلىپ، عيماراتتار قاجەتتى جابدىقتارمەن جانە جيھازدارمەن قامتاماسىز ەتىلدى. ارلەۋ جۇمىستارىنا وتاندىق ءوندىرىستىڭ ماتەريالدارى پايدالانىلدى.

- جوسالى ستانسياسىنىڭ ەكى قاباتتى ۆوكزالى 1905-جىلى سالىنعان. عيماراتتىڭ اۋدانى 628,8 شارشى مەتردى قۇرايدى. ستانتسيا ارقىلى جوسالىنى قازاقستاننىڭ ءىرى قالالارىمەن، سونداي-اق رەسەي، وزبەكستان جانە قىرعىزستانمەن بايلانىستىراتىن 22 جولاۋشىلار پويىزى وتەدى، - دەلىنگەن حابارلامادا.

تورەتام ستانتسياسىنداعى ەكى قاباتتى ۆوكزالدىڭ اۋدانى دا 628,8 شارشى مەتر. مۇنداعى ورتاشا تاۋلىكتىك جولاۋشىلار اعىنى 340 ادامنان اسادى. ستانسيا ارقىلى 22 جولاۋشىلار پويىزى قاتىنايدى.

1904-جىلى سالىنعان ارال تەڭىزى ستانتسياسىنىڭ ۆوكزالى قايتا جاڭعىرتۋدان كەيىن 439,8 شارشى مەترگە دەيىن ۇلعايتىلدى. مۇندا تاۋلىگىنە ورتا ەسەپپەن 640 تان استام جولاۋشى قاتىنايدى. ستانسيا ارقىلى ارالدى قازاقستان قالالارىمەن جانە كورشى ەلدەرمەن بايلانىستىراتىن 24 جولاۋشىلار پويىزى وتەدى.

قازىرگى ۋاقىتتا قىزىلوردا وبلىسىنداعى تەرەڭوزەك جانە جالاعاش ستانسيالارىنىڭ ۆوكزالدارىن جاڭارتۋ جۇمىستارى جالعاسىپ جاتىر.

ايتا كەتەيىك، ەلدە 100 تەمىرجول ۆوكزالدا قۇرىلىس-مونتاج جۇمىستارى اياقتالدى.