قىزىلشا ەپيدەمياسى: استانا اۋرۋحانالارى اۋزى-مۇرنىنا دەيىن تولدى

ەلوردادا قىزىلشا اۋرۋى ءورشىپ بارادى. ناۋقاستاردىڭ كوپشىلىگى - ۆاكسينا الماعان بالالار. دەگەنمەن ناۋقاستار اراسىندا ەرەسەكتەر دە بار، دەپ حابارلايدى Kazinform استانا اكىمدىگىنىڭ رەسمي سايتىنا سىلتەمە جاساپ.

قازىرگى ۋاقىتتا بالالار جۇقپالى اۋرۋلار ستاتسيونارى 1 ارتىق جۇكتەلگەن.

№ 3-كوپسالالى قالالىق بالالار اۋرۋحاناسىندا بارى - 300 توسەك-ورىن.

الايدا قىزىلشامەن كەلەتىندەردىڭ كوبەيۋىنە بايلانىستى قۋاتى 557 گە جانە تاعى 20 رەانيماتسيالىق توسەككە دەيىن ۇلعايدى.

«كوپ اتا-انالار ءالى كۇنگە دەيىن قىزىلشانىڭ قانشالىقتى قاۋىپتى ەكەنىن تۇسىنبەيدى. كەيبىر جەكە سەنىمى بويىنشا ولار ۆاكسينادان باس تارتادى. سەنىمسىز فاكتىلەرگە سۇيەنەدى. ءبىراق اۋرۋ باسقا اۋرۋلاردىڭ اسقىنۋىنا اپارادى. بولاشاقتا ناۋقاس بالادا قىزىلشادان ميدىڭ ءىسىنۋى، وكپەنىڭ ابسسەسسى سياقتى اۋىر زارداپتارعا، ساڭىراۋ بولىپ قالۋعا اكەلۋى مۇمكىن»، - دەيدى №6-ينفەكسيا ءبولىمىنىڭ مەڭگەرۋشىسى گۇلميرا نۇرتازينا.

اۋرۋحانانىڭ مالىمەتىنشە، قىزىلشامەن رەانيماتسيادا جاتقان بالالاردىڭ ءبارى جەلدەتكىشكە جالعانعان.

«قازىر اۋرۋحاناعا جاتقىزىلعان بالالاردىڭ � - ۆاكسينا الماعان. ونىڭ ءبارىنىڭ جاعدايى اۋىر. قىزىلشامەن 6 ناۋقاس رەانيماتسيادا جاتىر.

تورتەۋى اۋىر، ەكەۋى وتە اۋىر جاعدايدا. قازىر بۇل بالالاردىڭ اتا-اناسى دابىل قاعىپ، ۇرەيلەنىپ، بالالارى ءۇشىن الاڭداپ وتىر. ولار مۇنى بالالارىنىڭ جاعدايى اۋىر بولعان كەزدە عانا تۇسىنگەنى وتە وكىنىشتى»، - دەپ اتاپ ءوتتى №3-اۋرۋحانانىڭ رەانيماتسيا ءبولىمىنىڭ مەڭگەرۋشىسى ەكاتەرينا بۋلاتوۆا.

دارىگەرلەردىڭ ايتۋىنشا، نەگىزىنەن 14 جاسقا دەيىنگى بالالار اۋىرادى.

سونداي-اق، ەرەسەكتەر اراسىندا قىزىلشاعا قارسى ەشقاشان ۆاكسينا الماعان نەمەسە ۆاكسيناتسيا كۇنتىزبەسىنە سايكەس رەۆاكسيناتسيالانباعان ادامدار دا كەزدەسەدى.

دارىگەرلەر ەگەر بۇرىن قىزىلشا اۋرۋى نەگىزىنەن ءبىر جاستان اسقان بولسا، قازىر ناۋقاستاردىڭ اراسىندا 5-6 ايلىق بالالار بار ەكەنىن ايتادى.

قىزىلشا - ۆاكسينا ارقىلى الدىن الاتىن ۆيرۋس. بالانىڭ دەنساۋلىعى مەن ءومىرىن ۆاكسيناتسيا ارقىلى ساقتاۋعا بولادى.

اۆتور

جانات قاپالبايەۆا