قىزىلشا ءورشىپ تۇر: قىرعىزستاندا جىل باسىنان بەرى توعىز بالا قايتىس بولدى

بىشكەك. KAZINFORM - قىرعىزستاندا 2025 -جىلدىڭ باسىنان بەرى قىزىلشانىڭ اسقىنۋىنان توعىز بالا قايتىس بولدى. بۇل اقپاراتتى دەنساۋلىق ساقتاۋ مينيسترلىگى راستادى، دەپ 24.kg جازدى.

اگەنتتىك وكىلدەرىنىڭ ايتۋىنشا، ناۋقاستاردىڭ ەكپە ستاتۋسى ءارتۇرلى بولعان. كەيبىر ادامدار ءالى ۆاكسيناتسيا جاسىنا تولماعان، ال كەيبىرەۋلەرى ۆاكسينانى ءبىر رەت قانا العان.

رەسپۋبليكالىق يممۋنوپروفيلاكتيكا ورتالىعىنىڭ مالىمەتىنشە، 2025 -جىلعى 8-ساۋىردەگى جاعداي بويىنشا رەسپۋبليكادا قىزىلشامەن اۋىرعان 5168 جاعداي تىركەلدى، ونىڭ جارتىسىنان كوبى بىشكەكتە.

ساراپشىلار 4886 ناۋقاس (نەمەسە 95 پايىز) ەكپە الماعانىن، ونىڭ ىشىندە جاسىنا (31 پايىز)، ەكپەدەن باس تارتۋعا (44 پايىز)، كوشى- قونعا (1 پايىز)، مەديتسينالىق جەڭىلدىكتەرگە (9 پايىز) بايلانىستى ەكپە الماعانىن اتاپ ءوتتى. قالعان 9 پايىز جاعدايدا پاتسيەنتتەردىڭ ۆاكسيناتسيا ستاتۋسى بەلگىسىز. ولاردىڭ 282 ءسى (شامامەن 5 پايىز) MMR ۆاكسيناسىنىڭ ءبىر نەمەسە ەكى دوزاسىن العان.

رەسپۋبليكالىق يممۋنوپروفيلاكتيكا ورتالىعى جاڭارتىلعان ستاتيستيكانى كەيىنىرەك بەرۋگە ۋادە بەردى.

ال، قازاقستاندا قىزىلشا اۋرۋىنىڭ تارالۋى ازايعان.