قىزىل تەڭىزدە كەمەلەرگە شابۋىل جاساپ جۇرگەن حۋسيتتەر كىمدەر؟

استانا. قازاقپارات - 2000 -جىلداردىڭ باسىنان بەرى شەيىتتەر قوزعالىسى باسىم بولىگى سۇننيتتەردەن تۇراتىن يەمەن ۇكىمەتىنە قارسى كۇرەسىپ كەلەدى. كوتەرىلىسشىلەر جاقىندا قىزىل تەڭىزدەگى ءبىرقاتار كەمەلەرگە شابۋىل جاساپ، الەمدىك ساۋدانى بۇزدى، دەپ جازادى Euronews.

سوڭعى اپتالاردا قىزىل تەڭىزدە ساۋدا كەمەلەرىنە شابۋىل جاساپ جۇرگەن يەمەندىك حۋسيت كوتەرىلىسشىلەرى تاياۋ شىعىستا ايماقتىق قاقتىعىسقا ۇلاسىپ كەتۋ قاۋپى بار شيەلەنىستىڭ ورتاسىندا قالدى.

حۋسيتتەر - وزدەرىن يەمەندەگى شەيىت مۇسىلمان ازشىلىعى - زەيديتتەرمەن تەڭەستىرەتىن قارۋلى ساياسي جانە ءدىني توپ.

بۇل توپ حاماس پەن ليۆاننىڭ «حەزبوللاح» قوزعالىسىمەن قاتار يزرايل، ا ق ش جانە باتىسقا قارسىلىق تانىتىپ ءجۇر.

بۇل توپتى 1990-جىلدارى حۋسەين ءال-حۋسي قۇرعان، ءبىراق الەم ونىڭ بار ەكەنىن 2000- جىلداردىڭ باسىندا، ول يەمەننىڭ ۇزاق ۋاقىت بويى اۆتوريتارلىق پرەزيدەنتى بولعان ءالي ابداللا سالەحكە قارسى سوعىسقان كەزدە ءبىلدى.

2011 -جىلى «اراب كوكتەمى» كەزىندە سالەح بيلىكتى ورىنباسارى ابد-رابب مانسۇر حاديگە تاپسىردى.

2014 -جىلى حادي بيلىگى كەزىندە يران قولدايتىن حۋسيت كوتەرىلىسشىلەرى يەمەندەگى سولتۇستىك قورعانىنان شىعىپ، ەل استاناسى سانانى باسىپ الدى.

2015 -جىلى ەلدىڭ ءبىر بولىگىن باسىپ العان توپ حاديدى شەتەلگە قاشۋعا ءماجبۇر ەتتى.

ساۋد ارابياسى حۋسي ۇكىمەتىنىڭ ورناتىلۋىنان قاۋىپتەنىپ، سول جىلى يەمەننىڭ حالىقارالىق مويىندالعان ۇكىمەتىن بيلىككە قايتارۋ ارەكەتىنە ارالاستى.

ءبىراق جانجال اقىرى ساۋد ارابياسى مەن يران اراسىنداعى پروكسي سوعىسىمەن اياقتالدى.

يەمەندەگى سوعىس بىرنەشە جىلعا سوزىلىپ، الەمدەگى ەڭ كەدەي اراب مەملەكەتىن ويرانداپ، بەيبىت تۇرعىندار مەن سودىرلاردى قوسقاندا 150 مىڭ ادامنىڭ ءومىرىن قيدى جانە گۋمانيتارلىق اپاتقا ۇشىراتتى.

سوعىس ءبىر جىلدان استام ۋاقىت بۇرىن اتىستى توقتاتۋمەن اياقتالدى، ءبىراق بەيبىتشىلىككە ءالى قول جەتكىزىلگەن جوق.

حۋسيتتەردىڭ قازىرگى كوشباسشىسى - توپتىڭ نەگىزىن قالاۋشىنىڭ اعاسى ابدۋل-ماليك ءال-حۋسي.

حۋسيتتەر بۇعان دەيىن دە قىزىل تەڭىزدەگى كەمەلەرگە مەرزىمدى تۇردە شابۋىل جاساپ ءجۇردى.

17-قازاندا يزرايلدىڭ گازاداعى اۋرۋحاناعا جاساعان سوققىسىنان كوپتەگەن بەيبىت تۇرعىندار قازا تاۋىپ، جاراقات العان سوڭ توپ شابۋىلدارىن كۇشەيتتى.

حۋسيتتەر گازادا تۇراقتى اتىستى توقتاتۋعا قول جەتكىزىلمەيىنشە بۇل ارەكەتىن توقتاتپايتىنىن مالىمدەدى.

كوتەرىلىسشىلەر يزرايلمەن بايلانىسى بار كەمەلەردى نىساناعا العانىن ايتتى.

اۆتور

زارينا تۋعانبايەۆا