سولاردىڭ ءبىرى - جارىلعىش زاتتاردى ىزدەۋگە ماماندانعان ەلزا ەسىمدى قىزمەتتىك ءيت. ەلزا ۇلتتىق ۇلان ساپىندا 2019-جىلدان بەرى قىزمەت اتقارىپ كەلەدى. وسى ۋاقىت ىشىندە ول سەنىمدى ءارى كاسىبي كومەكشى رەتىندە تانىلعان. اسىرەسە استانا قالاسىندا وتەتىن ءىرى سپورتتىق جانە مادەني ءىس-شارالار الدىندا اۋماقتاردى تەكسەرۋگە قاتىسىپ، تۇرعىندار مەن قوناقتاردىڭ قاۋىپسىزدىگىن قامتاماسىز ەتۋگە كومەكتەسەدى.
ءتورت اياقتى ساقشىنىڭ سەنىمدى سەرىگى - استاناداعى 5573 اسكەري ءبولىمىنىڭ كينولوگى، 17 جىلدىق تاجىريبەسى بار سەرجانت بولات ءالجانوۆ. سولتۇستىك قازاقستان وبلىسىنىڭ تۋماسى ەلزانى كۇشىك كەزىنەن باپتاپ وسىرگەن. ونىڭ ايتۋىنشا، ءيتتىڭ العىرلىعى مەن بەلسەندىلىگى ەرتە بايقالعان.
ەلزا - سەرجانت ءالجانوۆتىڭ ءۇشىنشى قىزمەتتىك ءيتى. بۇعان دەيىن ول «داكل» اتتى ىزدەستىرۋ يتىمەن سەگىز جىلدان استام قىزمەت اتقارعان. كەيىن ەسىرتكى زاتتارىن ىزدەۋگە ماماندانعان لاكيمەن جۇمىس ىستەگەن. قازىرگى تاڭدا ەلزا وسى جاۋاپتى مىندەتتى ابىرويمەن جالعاستىرىپ كەلەدى.
كينولوگ پەن ونىڭ ءتورت اياقتى سەرىگى ءتۇرلى ۆەدومستۆوارالىق جارىستاردا دا جوعارى ناتيجە كورسەتكەن. 2023-جىلى ۇلتتىق ۇلاننىڭ قىزمەتتىك يتتەرى اراسىنداعى سايىستا جەكە ەسەپتە ءۇشىنشى ورىن السا، 2025-جىلى پەتروپاۆل قالاسىندا وتكەن جارىستا ءبىرىنشى ورىندى يەلەندى. سونداي-اق الماتى قالاسىندا وتكەن كۇشتىك قۇرىلىمدار اراسىنداعى تۋرنيردە كوماندالىق ەسەپتە جۇلدەگەر اتانعان.
قازىرگى تاڭدا ۇلتتىق ۇلان بولىمشەلەرىندە قىزمەتتىك يتتەر بىرنەشە باعىت بويىنشا جۇمىس ىستەيدى. اتاپ ايتقاندا، 75 ءيت جارىلعىش زاتتاردى انىقتاۋعا، 89 ى ەسىرتكى زاتتارىن ىزدەۋگە، ال 703 ءى پاترۋلدىك-ىزدەستىرۋ قىزمەتىنە ماماندانعان.
مامانداردىڭ ايتۋىنشا، كينولوگ پەن قىزمەتتىك ءيتتىڭ ۇيلەسىمدى جۇمىسى - كۇندەلىكتى دايىندىقتىڭ، ءوزارا سەنىم مەن تۇسىنىستىكتىڭ ناتيجەسى. بۇل قىزمەتتىك يتتەردىڭ دە اسكەري قىزمەتشىلەرمەن قاتار ەل قاۋىپسىزدىگىن قامتاماسىز ەتۋدە ماڭىزدى ءرول اتقاراتىنىن كورسەتەدى.